VIQUEQUE, 23 agostu 2021 (TATOLI)—Serbisu Edukasaun Munisípiu Viqueque, ohin orienta ona eskola sira atu realiza ezame periúdu daruak ho modelu rua mak hanesan ezame prezensiál hodi prienxe matéria iha sala-de-aula no avaliasaun.
“Ha’u simu orientasaun hosi Ministériu Edukasaun Joventude no Desportu (MEJD) kona-bá ezame periúdu daruak ne’ebé realiza iha 23 to’o 27 agostu, no ami fó orientasaun ba eskola-sira hodi hili, ezame ba matéria no avaliasaun,” Diretór Serbisu Edukasaun munisípiu Viqueque, Emídio Amaral hateten ba jornalista Agência Tatoli, iha edifísiu edukasaun Viqueque, segunda ne’e.
Notísia relevante:ESJ 4 setembru Viqueque selebra aniversáriu FALINTIL
Ho situsaun COVID-19 n maka eskola balun hili ezame matéria ho prezensiál, no balun halo de’it avaliasaun ba estudante-sira.
Maski nune’e, Serbisu Edukasaun munisípiu Viqueque iha realizasaun ezame periúdu datoluk nu’udár ezame pasajen klase sei laiha ona opsaun, nune’e obrigatoriamente eskola hotu-hotu tenke realiza ezame ba matéria.
Iha eskola tolu mak hili hodi halo de’it avaliasaun ba estudante-sira mak hanesan eskola Ensinu Sekundáriu Calisa no eskola EBC 01 Santa Maria Gorreti.
Iha fatin seluk, Diretora EBC 02 Cabira-Oan, Rita da Costa Soares, hateten eskola ne’e realiza ezame periúdu daruak tanba antes ne’e preparadu maski situasaun COVID-19.
Tuir observasaun Tatoli katak, iha implementasaun ezame periúdu daruak, estudante hosi EBC 02 Cabira-Oan kumpre regra prevensaun COVID-19 hanesan uza mascara no fase liman molok tama sala-de-aula, inklui distansiamentu sosiál.
Jornalista: Vitorino Lopes da Costa
Editór: Cipriano Colo
