DILI, 09 novembru 2021 (TATOLI)— Organizasaun Nasaun Unida no Programa Nasaun Unida ba Dezenvolvimentu (PNUD) iha Timor-Leste lansa peskiza kona-ba impkatu sosiu-ekonomiku ba populasaun kauza hosi COVID-19.
Biban ne’e, Primeiru Ministru, Taur Matan Ruak,agradese ba traballu ne’ebé ONU no PNUD halo liuhosi kooperasaun entre Ministériu Koordenadór Asuntu Ekonómiku no Diresaun Jerál Estatístika iha Ministériu Finansa.
“Ekonomia Timor-Leste monu, tanba kauza hosi fatór haat, ida mak instabilidade polítika ne’ebé laiha Orsamentu Jerál Estadu nune’e provoka resesaun ekonomia hanesan fator daruak, tuir pandemia COVID-19 no dezastre naturál iha fulan marsu 2020 no abríl 2021,” PM Taur hateten iha Lansamentu rezultadu peskiza ne’e iha otél Timor, tersa ne’e.
Iha fatin hanesan, Reprezentante Organizasaun Nasaun Unida (ONU) iha Timor Leste, Roy Trivedy, hateten, peskiza ne’e atu ajuda Governu hodi kria polítika adequadu iha futuru hodi bele hala’o indetifikasaun no apoia uma-kain vunerável iha situasaun pandemia globál.
“COVID-19 afeta tebes sósiu-ekonomiu iha Timor Leste nomós iha mundu liuliu ba uma kain sira ne’ebé mak vunerável no uma-kain sira ne’ebé mak dook husi sidade Dili hasoru inseguransa aihan, dezigualidade no vulnerabilidade,” nia akresenta.
Iha estudu ne’e konsege entervista ema 20.000, ne’ebé rezultadu hatudu 80% hetan impaktu sosiu-ekonomiku, no konsege simu apoia husi parte Governu no Sosiedade Sivíl, maibé ema barak mós la konsege hetan apoia.
Nune’e mós populasaun uma-kain 20%, iha tinan 2020 mak ki’ak liu, ne’ebé konsege faan rai, faan sasan hodi sustenta sira moris.
Entretantu, Reprezentante PNUD iha Timor Leste, Munkhtunya Altangerel, hateten, estudu ida hatudu katak juventude sira ho idade 25 to’o 29 barak mak lakon sira nia serbisu.
“Ita rekomenda presiza polítika ida di’ak liu hodi fó asistensia ka tau matan ba membru vunerável sira ne’ebé mak moris difisil iha situasaun pandemiane’e,’’ Representante UNDP iha Timor Leste Munkhtunya Altangerel informa.
Jornalista : Felicidade Ximenes
Editór : Florencio Miranda Ximenes
