DILI, 15 setembru 2021 (TATOLI)-Prezidente Interinu Autoridade Munisípiu Dili, António Moniz Calau, hamutuk ho nia ekipa, kuarta ne’e, distribui foos ba uma-kain 142 ne’ebé daudaun ne’e sei kontinua hela iha sentru evakuasaun hitu iha Munisípiu Dili.
Abitante uma-kain 142 ne’e nu’udar vítima inundasaun, 04 abríl 2021. Nune’e, ho orientasaun hosi Ministériu Administrasaun Estatál (MAE), maka ekipa Munisípiu Dili halo kedas servisu urjente ida ba sentru dezlokadu hodi haree vítima sira-nia kondisaun no preokupasaun sira.
“Ita hatán uluk ba preokupasaun kabun nian no kona-ba ba kondisaun hela fatin nian ita sei relata fali ba MAE,” António Moniz Calau hateten ba jornalista-sira hafoin distribui foos ba vítima inundasaun ne’ebé hela iha Sentru Dom Bosco, Comoro, Dili.
Nia hatutan, foos ekipa munisípiu lori ba ida ne’e parte ida reforsa ba Sekretáriu Estadu Protesaun Sivíl no Ministériu Solidariedade Sosiál no Inkluzaun ne’ebé durante fó apoiu nafatin ba vítima inundasaun sira.
“Foos ne’ebé ita ohin distribui ba ita-nia komunidade afetadu sira ne’e, kada uma-kain sei hetan foos saka rua ne’ebé ba sentru dezlokadu Dom Bosco xefe família 34 entaun ita fó apoiu foos saka-70 ne’ebé konta sentru dezlokadu hitu ne’ebé ohin ita apoiu foos ne’e hamutuk saka-284 tanba iha 142 xefe família,” nia esklarese.
Responsavel Sentru evakuasaun Dom Bosco, Comoro, Dili, Irmaun Adriano Maria de Jesus, SDB, hateten, hosi inísiu akontesimentu dezastre natural to’o Sentru Dom Bosco haree sira no oferese rai mamuk uitoan ba vítima sira hodi kuda modo han no balu ne’ebé kuda barak fa’an fali hodi sosa sira-nia nesesidade.
“Ida ne’e mak ami halo durante ne’e no ha’u fiar katak Governu la taka matan ba nia povu,” nia hateten.
Vítima inundasaun, Olimpia da Conceição hateten, nia parte agradese tebes hetan apoiu foos hosi Autoridade Munisípiu Dili, maibé sira hanesan refujiadu presiza tebes mós nesesidade báziku sira seluk hanesan, sabaun, rinso, no seluk tan tanba sira ho labarik ki’ik-oan sira.
Sentru dezlokasaun hitu iha Munisípiu Dili mak hanesan, Sentru Dom Bosco Comoro totál uma-kain 34, Manleuana-Kampu Real Madrid 41, Metiaut ualu, Sabraka-Laran Becora, ida, Eskola Bázika Akanunu 23, Kapela Bedik 27, no Manleuana- Rate-Ain iha hitu. Nune’e, totál uma-kain 142 ho membru família 782.
Jornalista : Arminda Fonseca
Editór : Francisco Simões
