BOBONARO, 16 setembru 2021 (TATOLI)—Sekretáriu Estadu Formasaun Profisionál no Empregu (SEFOPE), munisipiu Bobonaro, kontinua fó oportunidade ba grupu joventude ne’ebé iha inisiativa hakarak kria auto-empregu, hodi hadi’a moris.
“Hakarak hetan apoiu, tenke loke grupu atu hatama proposta no ita fasilita ho fundu ba tipu atividade,” Diretór SEFOPE munisípiu Bobonaro, Calistro Mau Ati, hateten ba jornalista iha kna’ar fatin, Soso Maliana, kinta ne’e.
Notísia relevante:Tinan sanulu, SEFOPE haruka Bobonaro oan 3.894 serbisu iha Austrália-Koreia
Kriteria atu submete proposta mak hanesan, sidadaun Timoroan, tenke kria grupu mínimu ema na’in-tolu no másimu lima, esperiénsia negósiu mínimu tinan ida, graduadu hosi sentru formasaun, universidade no ETV, iha sertifikadu ka diploma ne’ebé rejistu iha SERVE,IP, aprezenta ho sertifikadu.
Alende ne’e, membru grupu tenke rejistu iha sistema Web SEFOPE ka kartaun evidénsia, loke konta bankária BNCTL reprezenta grupu labele individu, deskreve formuláriu aplikasaun ne’ebé prepara ona hosi departamentu auto-empregu, aprezenta planu negósiu.
Fatin Grupu tenke permanente, proposta tenke asinadu hosi autoridade lokál, kopia BI, aprezenta deklarasaun hosi autoridade lokál katak, seidauk hetan apoiu hosi Governu no ONG no mapa lokalizasaun negósiu.
Bainhira simu tiha proposta sira-ne’e, sei enkamiña fali ba nasionál hodi halo avaliazasaun, prienxe ona rekezitu mak aprova orsamentu, hodi hahú sira-nia negósiu, maibé orsamentu ne’e aloka tuir tipu atividade ne’ebé la hanesan.
Grupu ne’ebe selesiona ona iha programa ne’e, ekipa mós sei bolu mai fahe informasaun, nune’e bele halo jestaun di’ak ba orsamentu ne’e to’o susesu.
Bainhira Governu transfere ona osan ba Grupu nia konta bankária, ekipa ida sei halo supervizaun mak identifika osan ne’e la utiliza tuir proposta ne’ebé submete, SEFOPE sei fo fila-fali no atribui fali ba grupu suplente ne’ebé presija.
Iha tinan ne’e, Governo preve tan orsamentu ho montante $5700.000 mai SEFOPE Bobonaro, atu apoia grupu auto-empregu ne’ebé mak daudaun ne’e submete ona proposta atu hetan fundus, hodi fanansia atividade.
Hahú 2015 to’o 2017, SEFOPE Bobonaro apoia ona grupu auto-empregu iha suku, Holsa, Ritabou, Odomau, Tapo-Memo, Lahomea no Raifun, Postu administrativu Maliana, ho setór atividade mak hanesan Hakiak fahi iha Grupu lima, karpintaria rua, dulas hare, soru no homan, tahu-tempe, alfayati, rentál copy, soru tais, ofisina no olitikultura orgánika.
Iha postu adiminiatrativu Cailaco, grupu auto empregu iha suku Meligo, Bilimau no Manapa, setór atividade mak hanesan, ofisina, dulas hare no karpintaria.
Postu administrativu Bobonaro, grupu ida de’it iha suku Lourba ho setór tipu kinur rahun, enkuantu iha postu administrativu Loloto’e mós iha grupu ida de’it, iha suku Lupal ho nia setór atividade karpintaria.
Postu administrativu Balibo grupu ha’at iha suku, Leohitu, Palaka, Cowa no Batugade ho nia setór atividade peskas, haki’ak ikan no karpintaria.
Postu administrativu Atabae iha grupu rua mak hanesan iha suku Atabae no Rairobo ho nia setór atividade mak hakiak ikan.
Grupu hirak ne’e, rejista desde 2015 to de’it 2017, iha tinan sira seluk to’o agora sei iha prosesu avaliasaun nia laran, tanba kestaun Covid-19 no Situasaun politika.
Jornalista: Sérgio da Cruz
Editór: Cipriano Colo
