COVALIMA, 24 setembru 2021 (TATOLI)-Asisténsia Legál ba Feto no Labarik (ALFeLa) fó asisténsia legál ba kazu violénsia doméstika hamutuk 136 no kazu violénsia seksuál 113 iha Munisípiu Covalima.
“Kazu ne’ebé mak ALFeLa presta ami halo asisténsia, númeru kazu ne’ebé aas mak kazu violénsia doméstika ho natureza ofensa simples la’ós de’it Munisípiu Covalima, maibé iha territóriu Timor,” Diretór Ezekutivu ALFeLa, Antonino Marques, ba jornalista iha Santa Rosa, sesta ne’e.
Misaun Alfela nian ” Apoia feto no labarik iha Timor-Leste hodi hetan asesu ba sistema justisa formál ne’ebé justu liuhusi assisténsia legál, edukasaun legál no advokasia. Vizaun: “Assegura feto no labarik hotu-hotu iha Timor-Leste bele hetan asesu ba sistema justisa formál ne’ebé justu no sein diskriminasaun.
Kna’ar ALFeLa atu fornese asisténsia legál gratuita ba vítima feto no labarik liuliu kazu sira hanesan kazu violénsia doméstika, violénsia seksuál, abuzu seksuál no kazu violénsia ba jéneru, violénsia ba LGBTI, ema ho defisiénsia hosi asiste justisa formal.
Durante ne’e ALFeLa rejista tipu kazu hanesan, kazu violénsia doméstika ho natureza kazu krime públiku hanesan kazu ofensa ba integridade kazu simples 119, ofensa ba integridade fízika grave kazu tolu (3), maus tratos konjuga neen (6), maus tratu ba konjuga ameasa ida (1), maus tratu ba menór kazu ida (1), violasaun seksuál tolu (3) no abuzu seksuál ba menór tolu (3).
ALFeLa mós rejista kazu violasaun seksuál ho natureza krime públiku hanesan kazu koasaun seksuál sia (9), abuzu seksuál ba menór ida (1), violénsia seksuál (28), violénsia seksuál gravadu (6), violénsia seksuál agravadu (1), abuzu seksuál ba menór (36), abuzu seksuál ba menór agravadu 16, aktu seksuál ho adolexente (12), abuzu seksuál ba ema ne’ebé vulneravel (1), violasaun seksuál (3).
Jornalista : Celestina Teles
Editór : Francisco Simões
