OÉ-CUSSE, 24 setembru 2021 (TATOLI)—Diretór Sekretário Estadu Formasaun Profisionál no Empregu (SEFOPE) RAEOA, Vicente Vaz, hateten durante períodu estadu emerjénsia no serka sanitária ne’e, SEFOPE kontinua atribui kartaun evidénsia ba joven sira atu kompletu dokumentu bainhira aplika ba vaga ruma.
“Iha estadu emerjénsia no serka sanitária, SEFOPE atende nafatin kartaun evidénsia ba joven sira bainhira sira presiza. Balun presiza kartaun evidénsia kona-bá formasaun profisionál no balun buka informasaun kona-bá empregu. Iha ne’e, ami atende nafatin. Kada loron minimál na’in-10 hanesan ne’e,” Vicente Vaz, informa ba Agência Tatoli, liuhosi telefónika, sesta ne’e.
Bainhira autoridade no iha dirasaun sira-ne’ebé halo rekrutamanetu ruma iha RAEOA, mak tratamentu distribuisaun ba kartaun evidénsia ne’e númeru sa’e maibé bainhira laiha vaga ruma, tratamentu mós menus no dalaruma laiha liu.
Esforsu ne’ebé durante ne’e SEFOPE hala’o mak loke Sentru Formasaun Bansone hodi fasilita joven sira tuir formasaun, maibé agora formasaun ne’e suspende provizóriu kuaze fulan-haat ona tanba kazu númeru pozitivu COVID-19 iha Oé-Cusse kada loron aumenta.
Entretantu, totál formandu ne’ebé tuir formasaun iha Sentru Formasaun Bansone hamutuk na’in-65, na’in-50 tuir formasaun kona-bá kontrusaun jerál hanesan karpintaria, soldadura, eletrisidade, kanalizasaun no na’in-15 tuir formasaun kona-bá agrikultura.
Jornalista : Abílio Elo Nini
Editór : Cancio Ximenes
