LAUTEM, 25 setembru 2021 (TATOLI) – Administradór Munisípiu Lautem, Domingos Sávio, hateten presiza kria komunikasaun di’ak entre autoridade, veteranu no entidade hotu atu hamutuk dezenvolve Postu Administrativu Iliomar, Munisípiu Lautem.
Notísia Relevante : SEKOMS diskute proposta harii rádiu komunidade ho autoridade Iliomar
“Ha’u husu entidade hotu hanesan xefe suku, aldeia, veteranu sira, ita tenke hamutuk lori dezenvolvimentu mai ita-nia rain, labele halo diferensa atu impede ajudu, katak nu’udar Iliomar oan imi hamutuk unidade, atu nune’e dezenvolvimentu susesu, no sai exemplar ba fatin hotu-hotu,” Domingos Sávio hateten iha edifísiu Postu Iliomar, sábadu ne’e.
Domingos hatutan, bainhira mosu dezentendimentu entre lider Iliomar bele impede ajudu ne’ebé iha, liuliu taka dalan ba ajudu seluk ne’ebé boot iha futuru.
Nia konsidera lider komunitáriu sira mak sai autór no ezemplu ba suku no postu liuliu iha prosesu dezenvolvimentu.
Domingos esplika, povu iha área rurál presiza informasaun atu nune’e loke hanoin no akompaña prosesu tomak ne’ebé akontese liuliu ligadu ba prosesu konstrusaun estadu.
Presiza mós kapasita juventude sira, hasa’e koñesimentu, matenek iha área oin-oin nune’e futuru mai governu sentrál nafatin tulun ba moris di’ak povu ninian.
Iha fatin hanesan, administradór postu Iliomar, Jacob dos Reis hateten prontu atu hala’o servisu ba dezenvolvimentu postu Iliomar mézmu foin mandadu semana tolu simu pose.
Nia husu atu Governu sentrál konsidera preokupasaun povu Iliomar nian ligadu ba kondisaun estrada ne’ebé kategoria nasionál ne’ebé kondisaun ladún di’ak.
“Ami preokupa mak estrada nasional hosi Lospalos mai Iliomar to’o Viqueque ne’ebé nia kondisaun ladún di’ak tanba ne’e faze dahuluk hakarak hadi’a estrada,” Jacob hateten.
Postu Iliomar rasik hamutuk suku hitu; Aliebere, Caenliu, Fuat, Iliomar 1, 2, Trilolo no Uma Ana Iku ho total populasaun 10.976.
Jornalista : Natalino Belo
Editor : Francisco Simões
