OÉ-CUSSE, 30 setembru 2021 (TATOLI)—Sekretáriu Rejionál Asuntu Komérsiu no Indústria, Pedro da Cunha Boquifai, informa komunidade iha suku Taiboko, sub-rejiaun Pante Makasar, ho inisiátiva harii rasik merkadu tradisionál ida iha aldeia Hauboni.
“Komunidade hatama proposta ba autoridade RAEOA no foin daudaun ne’e, ita ba observa no loke ona merkadu ne’e hodi bele hala’o atividade faan no sosa. Maibé, sei provizóriu hela tanba presiza kompletu rekezitu balun kona-bá estatutu rai ninian,” Pedro da Cunha Boquifai, informa ba Agênsia Tatoli iha Palaban, Oé-Cusse, kinta ne’e
Tuir proposta, komunidade hakarak loke merkadu tradisionál tanba komunidade iha aldeia ne’e izoladu no dook hosi merkadu tradisionál sira seluk iha Oé-Cusse, entaun afeta ba sira-nia produtu lokál ne’ebé susar atu faan iha merkadu.
Atu konkretiza inisiativa ne’e, komunidade organiza malu loke estrada foun kuaze kilómetru rua (2) atu asesu ba merkadu refere, no autoridade ba observa ona fatin ne’e no fatin refere estratejiku duni.
Maske nune’e, sei presiza kompleta tán rekezitu sira hanesan titlu rai, entaun parte Komersiu sei konfirma ho Ordenamentu Teritoriu no Kadastru liu-liu Teras no Propriedade hamutuk ho agrikultura atu rezolve lai rai ne’e, nune’e iha futuru labele akontese problema ho kintál na’in.
“Bainhira estatutu rai rezolve ona, Prezidente Autoridade mak sei loke ofisiál no halo inugurasaun, nune’e sai merkadu tradisionál ida iha Oé-Cusse liu-liu iha suku Taiboko,” nia dehan.
Xefe suku Taiboko, Joaquin Tafin, hateten loke merkadu foun ne’e inisiativa hosi komunidade hamutuk ho autoridade lokál suku Taiboko, komunidade oferese rai ektare rua (2) atu sai fatin públiku hodi uza ba merkadu tradisionál
“Fatin ne’e estratejiku tanba sei konsentra komunidade suku lima iha sub-rejiaun Nitibe, tanba fatin ne’e iha sentru. Daudaun ne’e, komunidade utiliza ona fatin ne’e hodi faan sasán kada semana ida dala ida, iha kada kinta-feira,” nia hateten.
Molok ativa merkadu ne’e, komunidade suku Taiboko subemte uluk karta autorizasaun ba autoridade RAEOA liuhosi Sekretáriu Rejionál Asuntu Administrasaun no hetan aprovasaun hosi Sekretáriuu Rejionál Asuntu Turizmu Komunitáriu.
Entretantu, totál populasaun iha suku Taiboko hamutuk 6.705, ne’ebé kompostu hosi aldeia Ulas ho totál populasaun 1.936, aldeia Nemun totál populasaun 1.894, aldeia Hauboni totál populasaun 892 no aldeia Maquelab ho totál populasaun 1.983.
Jornalista : Abílio Elo Nini
Editór : Cancio Ximenes
