DILI, 05 outubru 2021 (TATOLI)— Ministériu Agrikultura Peska (MAP) rejista konsumu nasionál ba foos kada tinan hamutuk tonelada 137.800 ba populasaun territóriu millaun 1,3 (sensu 2015).
“Maibé daudaun ne’e produsaun nasionál iha tinan 2021 foin atinje tonelada 72.000, quer dizer sei presiza nafatin importa maizumenus tonelada 60.000-resin,” Diretora Jerál MAP, Maria Odete do Céu Guterres, hateten iha ninia knaar fatin, Comoro, tersa ne’e.
Notísia relevante: Previzaun MAP: tinan 2021 produsaun foos bele atinje tonelada 60.000
Tuir Diretora, bele hapara importasaun maibé presiza iha esforsu atu hasa’e produsaun rai-laran.
“Atu hamenus importasaun bele, maibé ita tenke halo halo esforsu boot ida atubele serbisu iha área agrikutura,” nia akresenta.
Atu hasa’e produsaun rai-laran, MAP koopera ona ho parseiru internasionál hanesan To’os ba Moris Di’ak (TOMAK), Ajénsia Kooperasaun Internasionál Japaun (JICA, sigla inglés) no ajénsia internasionál seluk, hodi fó apoiu ba agrikutór sira, nune’e bele hasa’e produsaun ai-han iha Timor-Leste.
Notísia relevante: TOMAK estabelese programa ai-han nutrisaun iha suku neen postu Baucau
Aleinde ne’e, MAP mós rejista tinan ne’e área kultivasaun sa’e, hosi área poténsia agríkola daudaun ne’e ektare 80.568, iha aumentu área kultivasaun 24.540, ho projesaun hare tinan ne’e ektare 97.660, ne’ebé ekivalénsia ba foos tonelada 58.000 to’o 60.000.
MAP no komunidade halo kolleta hare iha Webaba iha rai ektare 763, hosi rai poténsia ektare 2.073 no sei kolleta tan iha rai ektare 1.640.
Enkuantu, Bobonaro iha poténsia rai ektare 700-resin, ho projesaun tinan ne’e sa’e ba ektare 4.743.
Jornalista : Natalino Costa
Editora : Julia Chatarina
