BAUCAU, 18 outubru 2021 (TATOLI) – Progresu projetu mão de obra iha postu administrativu Baucau vila, munisípiu Baucau iha atinje ona 55%.
Administradór Postu Administrativu Baucau, Francisco Ximenes, hateten projetu mão de obra ne’e ho durasaun loron 30 no totál orsamentu rihun $47.750 ne’ebé fahe ba programa haat no kada programa 25%.
“Progresu hosi atividade pinta trotoár, monumentu, manutensaun estrada no limpeza jerál ninia progresu ita bele dehan iha ona 55%,” Administradór postu Baucau informa ba Agéncia TATOLI, iha nia kna’ar-fatin, vila antiga, segunda ne’e.
Projetu Mão de Obra ne’e ho durasaun serbisu loron 30 ne’ebé koloka ba faze fahuluk ho durasaun serbisu loron 15 no faze daruak loron 15. Faze dahuluk nian finaliza ona iha loron 15 outubru liubá no faze daruak sei finaliza iha loron 30 outubru.
Francisco akresenta, durante implementasaun kada grupu idak-idak totál na’in-20 no laiha dezintendimentu.
“Membru inklui xefi ekipa faze dahuluk ninia orsamentu sira simu ona, hanesan subsídiu durante implementasaun atividade,” nia akresenta.
Atividade hanesan limpeza jerál hahu hosi área Nagardjo, Sentru Saúde Riamare kontinua to’o vila nova, manutensaun ba estrada kuak no ateru rai-mutin, pinta monumentu hanesan estátua inklui trotoár mak sei iha faze finál.
“Trotoár sei pinta ikus nune’e fó beleza ba sidade, liuliu relasiona ho tempu preparasaun ba selebrasaun loron 28 novembru ne’ebé sei realiza iha Baucau,” Francisco argumenta.
Traballadór sira hamutuk na’in-40 no kada ema na’in-ida sei simu subsídiu $ 5 no xefe grupu $7 loron ida.
Jornalista : Natalino Belo
Editór : Evaristo Soares Martins
