DILI, 21 outubru 2021 (TATOLI)– Ekipa Ramelau FC obrigadu tenke “hakne’ak” ba Mushila FC iha jogu jornada dala-17, Pra Liga Futsal Timor-Leste ne’ebé halao iha kampo futsal FALINTIL-Forsa Defeza Timor-Leste (F-FDTL).
Ramelau antes ne’e halo ekipa hotu tenke rende ba nia tanba ekipa jigante iha liga futsal, maibé iha minutu 40 nia laran, Mushila FC ho aten-brani fera duni Ramelau nia forsa hodi obriga Ramelau tenke hakruuk tanba manán ho rezultadu 3-0.
Notísia relevante: Baucau All Star “lolo” Academica 8-4
Bainhira jogu hala’o kampu ninin enfeta ho adeptu entre ekipa rua, hamriik ho pozisaun ne’ebé metin hodi apoia sira nia ekipa favoritu Mushila no Ramelau.
Jogu ne’e, la’o iha ambitu ne’ebé manas jogadór-sira ho emosaun ne’ebé makas, Mushila iha ambisaun ne’ebé boot atu manan jogu ne’e no Ramelau mós iha ambisaun atu manan jogu ne’e.
Nune’e, iha minutu ualu jogadór Mushila, Rui Martins konsege fura ona rede Ramelau hodi hatur rezultadu ba 1-0, golu ne’e halo adeptu sira kontente tanba sente imposivel bele hatama uluk golu ba ekipa forte hanesan Ramelau.
Ho golu ne’e, jogadór Ramelau nafatin esforsu atu halo empate jogu ne’e, maibé la konsege tanba jogadór Mushila taka metin hodi la fó oportunidade ba Ramelau to’o jogu primeiru parte ramata.
Tama ba segunda parte Mushila iha ambisaun no esperansa atu manan jogu ne’e no komprova duni tanba iha minutu 32 jogadór Eufrasio Soares lansa tan golu ida muda rezultadu ba 2-0.
Golu ne’e halo Ramelau laiha forsa iha kampu laran no jogadór komesa jogu ho emosaun no la ho kalma ikus mai jogadór Joel Baptista tenke simu kartaun mean hosi árbitru, bainhira halo falta hasoru jogadór Mushila Rui Martis iha minutu 36.
Jogu komesa manas liutan, minutu besik termina ona Ramelau tenke lakon duni ona. Maibé iha minutu 39, jogadór Mushila Rui Martins halo tan golu ida no save metin kedas vitória ba Mushila ho eskore 3-0.
Hosi jogu ne’e, Mushila halo istória boot iha nia jornada-17 tanba bele halakon ekipa jigante ne’ebé klubu hotu dada iis atu hasoru sira.
Nune’e, Mushila hetan pontu tolu ho pontu 40 hodi okupa iha tabele klasifikasaun segundu no Ramelau mantein ho pontu 46 hodi komanda nafatin tabela klasifikasaun iha liña primeiru.
Notísia relevante: Jerman “hisik” Bermeta 6-0
Jornalista : Hortencio Sanchez
Editór : Florencio Miranda Ximenes
