LIQUIÇÁ, MUNISÍPIU, NASIONÁL

Administradór Bazartete husu Governu asegura labarik sira hosi impaktu lixeira Tibar

Administradór Bazartete husu Governu asegura labarik sira hosi impaktu lixeira Tibar

Aktividade Joven no labarik sira baihira hili sasan ujadu hanesan, kalen no besi neebe soe iha fatin lixu Tibar, 5 /2/2021.Imajen Tatoli/Antonio Goncalves.

LIQUIÇA, 19 novembru 2021 (TATOLI)—Administradór postu Bazartete, munisípiu Liquiça, João Nascimento Brás husu Governu kria lalais planu foun atu asegura komunidade no labarik sira-nia saúde hosi impaktu lixeira Tibar.

Administradór Postu Bazartete hato’o preokupasaun ne’e relasiona ho dezisaun Governu ho parseiru sira nian hodi hili suku Tibar sai fatin ba selebrasaun Loron Mundiál ba Labarik ho tema prinsipál ‘Hamutuk Ita Promove no Salva Guarda Labarik Sira hosi Pandemia no Dezastre Naturál’.

Notísia Relevante: Traballu infantil aumenta, MSSI husu PN aselera lei protesaun labarik

“Ami agradese no obrigadu tanba suku ida-ne’e bele sai fatin hodi selebra loron mundiál ba labarik sira maibé ami sente triste no okupadu uitoan. Nai ulun sira hili ona fatin ne’e maibé labele haluha fatin Tibar sai fatin fóer ba nasaun TL nian,” Administrador Bazartete liuhosi nia intervensaun iha Selebrasaun Loron Mundiál ba Labarik ne’ebé realiza iha Tibar, sesta ne’e.

Nia rekoñese, lixu ne’ebé daudaun ne’e iha lixeira Tibar seidauk hatudu impaktu ruma maibé predisaun iha tinan lima to’o sanulu ba oin, komunidade no labarik sira iha Suku Tibar sei hetan impaktu makaas tebes liu-liu ba saúde bebé, labarik no inan sira nian iha futuru.

“Ha’u lori komunidade Bazartete no Suku Tibar husu ba nai ulun sira atu haree no tetu hodi fó solusaun. Ami-nia rekomendasaun ida ne’e favor Governu haree took ba,” nia dehan.

Nuune’e, nia ekomenda ba Governu atu selebrasaun hanesan ne’e labele iha de’it suku sira-ne’ebé besik sidade maibé ba mós suku rurál sira atu informasaun sira-ne’e bele asesu mós husi komunidade iha área rurál hodi komprende saida mak loron mundiál ba labarik no direitu ba labarik sira.

Labarik la eskola preokupa hili lixu

Reprezentante Uma Mahon Fundasaun Forum Komunikasaun Juventude, Domingas Ferreira “Ama Doo” esplika, tuir sira-nia servisu asisténsia ne’ebé halo ba labarik sira iha Suku Tibar mós identifika labarik barak mak la kontinua eskola tanba preokupa ho hili lixu iha lixeira Tibar hodi buka osan ba nesesidade loron-loron.

“Ami identifika labarik barak. Sira balun la eskola no seluk para eskola. Ami husu tanba saida imi la eskola, sira hatán dehan ba hili lixu sei hetan osan barak hodi bele sustenta moris no família. Mai ha’u ne’e di’ak maibé triste liu mak sira balun hili fali hahan ne’ebé liu prazu ne’ebé ema soe ona ne’e hodi han. Ida-ne’e se fó impaktu boot ba labarik sira-nia saúde,” Domingas hateten.

Durante Uma Mahon halo intervensaun ba labarik sira iha suku Tibar ho apoiu hosi Gabinete do Apoiu Atívidade Konjuga Prezidente Republika ne’ebé lidera hosi Espoza Prezidente Repúblika, Cidalia Nobre Lopes Mouzinho Guterres, konsege lori hikas labarik 24 iha suku Tibar hodi kontinua sira-nia eskola.

Vise-Ministra Solidaridade Sosíal no Inkluzaun (MSSI), Signi Chandrawati Verdial, hateten problema lixu iha Tibar ne’e kompeténsia ministériu seluk nian maibé rekomendasaun ba MSSI mak oinsá hare’e famili kbiit laek hela iha área líxeira Tibar hodi tau prioridade iha programa bolsa da mãe.

“Ohin ami rona ona rekomendasaun sira no tékniku sira sei rekolla Kartaun Eleitorál no haree rekezitu sira oinsá bele hetan apoiu hosi programa refere,” Signi Verdial esplika.

Suku Tibar lokaliza iha postu administrativu Bazartete, munisípiu Liquiça ho aldeia haat mak hanesan Fatunia, Libaulelo, Mau-Soi no Turleu. Tuir dadus Sensu Populasaun iha tinan 2015 totál populasaun iha suku refere hamutuk 4211.

Reporter : Cidalia Fátima

Editór    : Cancio Ximenes

iklan
iklan

Leave a Reply

iklan
error: Content is protected !!