VIQUEQUE, 27 novembru 2021 (TATOLI)—Estrutura nasionál inaugura sede foun Partidu Frente Revolucionária do Timor-Leste Independente (FRETILIN) iha munisípiu Viqueque, sábadu ne’e.
“Ha’u husu ba komisáriu politíka no estrutura ne’ebé serbisu iha sede FRETILIN Viqueque, labele bandu povu asesu ba instalasaun ne’e. Portaun sede labele taka hodi ema hotu bele mai aprende no halo diskusaun iha laran, tanba ne’e mak ita harii sede,” Sekretáriu Jerál FRETILIN, Mari Bin Amude Alkatiri, hateten hafoin inaugura sede foun, iha munisípiu Viqueque.
Tuir nia, inisiativa harii sede tanba tinan barak ona, bainhira líder partidu sira tun ba munisípiu, militante sira sempre ezije fatin hodi halibur malu.
“Agora sede iha ona, militante sira bele diskute problema nasionál no partidu FRETILIN. Hanoin ba ida-ne’e maka Komité Sentrál FRETILIN (CCF, sigla portugés) deside hahú prosesu harii sede iha munisípiu ida-idak atu sai fatin halibur malu hodi troka ideia hametin ita-nia Estadu ho sentidu pátria,” nia akresenta.
Iha fatin hanesan, Koordenadór Komisaun Polítika FRETILIN munisípiu Viqueque, Dario Madeira, agradese tanba iha ona fatin hodi fó mahon ba militante iha rejiaun ne’e.
“Agradese tebes tanba ita finaliza ona konstrusaun sede hodi halibur hamutuk diskute asuntu ruma iha laran,” nia dehan.
Konstrusaun ne’e mai hosi CCF, ne’ebé akula hotu uma, morru, no materiál iha laran hamuutuk ho kustu $100.000-resin.
Iha ámbitu inaugurasaun, sede partidu hetan bensaun hosi Amu Vigáriu Viqueque, Tiago da Costa.
Seremónia ne’e partisipa hosi estrutura nasionál, Administradór Viqueque, Januário Soares ‘Bolly’ inklui militante partidu.
Jornalista : Vitorino Lopes da Costa
Editora : Julia Chatarina
