DILI, 01 dezembru 2021 (TATOLI)—Governu liuhosi reuniaun Konsellu Ministru (KM), iha kuarta ne’e, aprova Projetu Dekretu-Lei Governu kona-ba Sentru Akollimentu Multifunsaun, ne’ebé aprezenta hosi Ministru Administrasaun Estatál, Miguel Pereira de Carvalho.
“Sentru akollimentu ne’e destina ba alojamentu temporáriu ba vítima asidente grave no katástrofe sira,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu iha Palásiu Governu.
Notísia relevante: Manleuana no Metinaro sai sentru akollimentu multifunsaun ba vítima inundasaun
Antes ne’e, liuhosi reuniaun ezekutivu diskute fatin rua hanesan Manleuana no Metinaro hodi harii sentru.
Entretantu, hafoin inundasaun iha loron 04 abríl 2021, ema hamutuk na’in-34 maka mate no na’in-14 maka lakon iha nível nasionál, família hamutuk 30.322 maka afeta ba inundasaun, ne’ebé entre família sira ne’e, família 24.816 hosi munisípiu Dili inklui uma hamutuk 4.231 mak hetan estragu totál.
Jornalista : Antónia Gusmão
Editora : Julia Chatarina
