DILI, 06 dezembru 2021 (TATOLI)—Sentru Quesadhip Ruak (CQR) segunda ne’e, lansa biblioteka ba labarik sira, nune’e bele atrai labarik sira atu lee livru.
“Ohin ita halo lansamentu ho inaugurasaun ba biblioteka ne’ebé apoia hosi Korea, liuhosi NGO Jeju,” Fundadora Fundasaun Sentru Quesadhip Ruak, Isabel da Costa Ferreira, hateten ba jornalista sira iha Sentru Quesadhip Ruak, Taibesi, Dili.
Livru ne’ebé sira prepara iha biblioteka ne’e iha livru lian Korea ne’ebé tradús ba tetun, no hosi livru ne’e maioria istória ne’ebé sira foti uitoan hosi Timor no istória hosi illa Jeju ne’ebé sira halo tradusaun lian Korea ba tetun ho nia dezeñu animasaun ne’ebé atrai labarik sira atu lee.
Fundadora Sentru Quesadhip Ruak informa, biblioteka ne’e antes ne’e hetan apoia hosi Embaixadór Aústralia, ne’ebé apoia livru ho lian portugés, inglés no agora iha livru ho lian Korea no Tetun.
“Ha’u hanoin ida-ne’e kondisaun ida atu ita bele kria ba labarik sira no ba joven sira-ne’ebé kursu hela lian Korea sira mós bele mai uza fatin ne’e atu lee. Tanba iha ne’ebá iha lian korea ho tetun, nune’e sira bele lee hodi aprende mós lian korea hosi istória badak sira-ne’e,” nia dehan.
Biblioteka ne’e nakloke ba ema hotu, hanesan ba sira ne’ebé hakarak mai lee no iha interrese atu hatene istória korea nian bele mai lee hosi livro ne’ebé mai hosi Pastór sira prepara ona tradús ba tetun.
“Ha’u hanoin ida-ne’e ba labarik sira di’ak tebes no ha’u husu ba labarik sira, liu-liu sira-ne’ebé iha Taibesi no Kuluhun bele uza oportunidade atu mai uza biblioteka ne’e hodi lee livru sira ne’ebé oras ne’e daudaun iha biblioteka Kaza Sidadania Taibesi. Tanba, livru ne’ebé sira oferese ne’e naton ba komunidade iha ne’e no ba labarik sira-ne’ebé uza fasilidade fundasaun ida-ne’e bele utiliza livru ne’e no livru ne’e sufisiénte tebes ba labarik sira-ne’ebé frekuenta atividade iha fundasaun,” nia dehan.
Embaixadór Korea iha Timor Leste, Kim Jeong Ho, agradese ba inisiativa Sentru Quesadhip Ruak, liuhosi NGO jeju hodi bele inaugura biblioteka labarik ne’e ho maneira atu ajuda realiza labarik nia mehi no esperansa iha futuru.
“Tanba, mehi agora kada suku no eskola iha bibliotaka atu labarik sira bele lee livru di’ak no halo atividade interresante ho mundu foun,” nia dehan.
Jornalista : Nelia Fernandes
Editór : Cancio Ximenes
