DILI, 09 dezembru 2021 (TATOLI)—Deputadu sira iha Parlamentu Nasionál, kinta ne’e aprova proposta Orsamentu Jerál Estadu 2022 ho montante $258.110 ba tinan fiskál 2022 iha faze espesialidade hodi fó apoiu ba klínika Bairru Pite, Lanud., Dili.
Iha debate OJE 2022 ne’e, reprezentante povu aprova proposta númeru 45 ne’ebé aprezenta hosi proponente Mariano Assanami Sabino ho montante $258.110 ba tinan oin, hodi apoiu no atende nesesidade klínika Bairru Pite, ho rezultadu votasaun a-favór 51, kontra 0 no abstensaun 14.
“Osan ne’e ami hanoin katak horibainhira Ministru Finansa rasik esplika katak iha osan ida ne’ebé hamutuk bele transfere ba programa sira-ne’e,” Deputadu Proponente, Mariano Assanami Sabino, hateten iha plenária PN, kinta ne’e.
Títulu servisu Dotasaun todo Governu, kategória despeza transferénsia públika, ho programa kódiku 983 kona-ba investimentu no diversifikasuan ekonómika, dotasaun inisiál iha $52.500,000 alterasaun hasai $258.110.
Nune’e, sei tau fali ba títulu servisu Ministéiru Saúde ba kategória despeza tranferénsia públika ho programa kódiku 805 kona-ba saúde iha dotasaun inisiál $10,998.800 alterasaun aumenta $258.110 nune’e dotasaun finál aumenta ba $11,256.910
Justifikasaun sumáriu hosi proponente katak, klínika Bairru Pite, Lanud, fó ona nia kontribuisaun ida ne’ebé di’ak no kualidade tebes, durante ne’e hodi halo atendimentu ba populasaun Timor-Leste ne’ebé presiza tebes asisténsia médiku, liu-liu ba inan isin-rua ne’ebé presiza atendimentu ba partu nian, moras kankru sira-ne’ebé presiza halo atendimentu intensivu.
Pasiente sira-ne’ebé presiza baixa hodi halo kontrolu ida efisiente no rigorozu no seluk tan, maibé durante ne’e defisíl tebes ba iha rekursu orsamentu atu bele orsamenta ba nesesidade hirak ne’e.
Bankada Partidu Demokrátiku propoin orsamentu adisionál ho montante $258.110 ne’ebé atu aloka ba nesesidade atendimentu má nutrisaun no alimentasaun ba pasiente sira ho montante $85.600, nesesidade atendimentu ba maternal infantil, farmásia ho kankru raan ho montante $49.560 no ba nesesidade atendimentu funsionáriu klínika no reforsa instituisaun ho montante $122.950.
Ministra Saúde, Odete Maria Freitas Belo, pronunsia katak Governu laiha rejeisaun ba iha proposta ba klínika Bairru Pite tanba orsamentu mai la fó impaktu ba tetu orsamentu.
Jornalista : Nelson de Sousa
Editór : Cancio Ximenes
