iklan

EKONOMIA, COVID-19, HEADLINE

Governu ezekuta ona Fundu COVID-19 millaun $200,9

Governu ezekuta ona Fundu COVID-19 millaun $200,9

Osan Dolar Amérika. Imajen/Espesiál

DILI, 06 janeiru 2022 (TATOLI)–Taxa ezekusaun reál Fundu COVID-19 ne’ebé kria iha tinan 2020 atu responde ba COVID-19, jere hosi Ministériu Finansa (MF), to’o iha loron 31 dezembru 2021 atinjie millaun $200,9 ka 70%, hosi totál Orsamentu Retifikativu alokadu millaun $287,6.

“Taxa ezekusaun ne’e a’as liu, maski iha tinan kotuk Timor-Leste aplika restrisaun oioin ne’ebé limita movimentu ema no sasán sira kauza hosi COVID-19, inundasaun no períodu ezekusaun durante fulan-hitu nia laran de’it, hafoin Prezidente Repúblika promulga Orsamentu Retifikativu iha maiu 2021,” relata nota ne’ebé Agência TATOLI asesu, kinta ne’e.

Notísia relevante: PN aprova Fundu COVID-19 ho Fundu Infraestrutura

Antes ne’e, MF halo projesaun ne’ebé bazeia ba fluxu kaixa no ritmu ezekusaun hosi janeiru to’o novembru, katak taxa ezekusaun reál Fundu COVID-19 to’o dezembru 2021 sei atinje de’it 66% no iha tinan kotuk taxa ezekusaun reál atinje 58%.

Taxa ezekusaun tuir klasifikasaun ekonómiku, a’as liu mak iha kategoria bens no servisu, ne’ebé mak ezekuta millaun $149,5 ka 76% hosi orsamentu alokadu millaun $197,5, tuir kedan ho transferénsia públika ne’ebé mak ezekuta millaun $46,8 ka 62% hosi orsamentu alokadu millaun $75,9.

Enkuantu, kapitál dezenvolvimentu ezekuta millaun $2,9 ka 36% hosi orsamentu alokadu millaun $8,1, no kapitál menór ezekuta millaun $1,7 ka 28% hosi orsamentu alokadu millaun $5,9.

Tuir mai progresu ezekusaun reál tuir medida sosio-ekonómiku neen hanesan moratória kréditu ezekuta ona 100% hosi orsamentu alokadu millaun $2, pagamentu Cesta Bázika ezekuta ona millaun $66,2 ka 97% hosi orsamentu alokadu millaun $68,1.

Nune’e, pagamentu suplementu remunerátóriu ba traballadór liña frente ezekuta ona millaun $51,6 ka 97% hosi orsamentu alokadu millaun $53,4, pagamentu izensaun propina ba estudante ensinu superior ezekuta millaun $11,1 ka 79% hosi orsamentu alokadu millaun $14.

Medida apoiu ba empregu ezekuta millaun $30,8 ka 68% hosi orsamentu alokadu millaun $45,3, apoiu seguransa alimentár ezekuta millaun $7,2 ka 60% hosi orsamentu alokadu millaun $12, apoiu pulsa internet ba estudante ensinu superiór ezekuta $872.200 ka 41% hosi orsamentu alokadu millaun $2.

Prevensaun no mitigasaun COVID-19 inklui finansiamentu operasaun Sentru Integradu Jestaun Krize, ezekuta millaun $31,2 ka 37% hosi orsamentu alokadu millaun $83,4.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!