Top

Xefe Suku Bemori husu Governu reativa PMOPA hodi halo limpeza

Komunidade Postu Administrativu Don Aleixo, Munisípiu Dili, halo limpeza jerál iha área kampung Alor, Dili, Imajen Tatoli/Arminda Fonseca

DILI, 07 janeiru 2022 (TATOLI)—Xefe Suku Bemori, Cristalina Perira Soares de Oliveira husu Governu, liuhosi Autoridade Munisípiu Dili atu reativa Programa Mão de Obra Postu Administrativu (PMOPA) tanba bele ajuda aldeia halo limpeza.

Notísia Relevante: OJE 2022, Munisípiu Dili husu adisionál millaun $13,5

“Programa PMOPA ne’e finaliza ona iha dezembru 2021. Tanba ne’e ha’u husu ba Governu se bele reativa fila–fali Programa Mão de Obra Postu Administrativu, tanba programa ne’e bele ajuda ona aldeia sira atu bele halo limpeza no hamoos aldeia sai moos liután. Ho programa hanesan ne’e ita bele fó kampu traballu ba joven sira-ne’ebé dezempregu ba servisu,” Cristalina Perira Soares de Oliveira hateten ba Agência Tatoli, iha nia knaar–fatin suku Bemori, Dili, sesta ne’e.

Iha Programa Mão de Obra Postu Administrativu ne’e Autoridade Munisípiu Dili aloka orsamentu mai iha Administradór Postu Administrátivu sira hodi hatun mai iha Xefe Suku atu implementa, tanba ne’e iha fulan-novembru no dezembru tinan 2021, suku Bemori hetan orsamentu hamutuk $4,182.

“Entaun, hosi totál orsamentu ne’e ita ezekuta ona, tanba ita–nia programa ne’e finaliza ona,” nia dehan.

Nia informa, iha programa ne’e traballadór hamutuk na’in–20 inklui supervizór no hosi númeru ne’e mai hosi aldeia hitu (7) ne’ebé kompostu hosi aldeia Baba Liurai Leste, Baba Liurai Oe–este, Bemori Sentrál, Ailele–hun, Has–Laran, Sentru no My Friend, hosi aldeia hitu (7) ne’e sira hala’o limpeza iha suku durante fulan rua ho durasaun loron 20.

“Ne’ebé, ita–nia traballadór na’in–20 ne’e, kompostu hosi feto no mane ne’ebé halo servisu rutina, hanesan hamoos balleta, estrada ibun no komunidade nia uma ninin hahú hosi segunda to’o sesta. Entaun, hosi atividade limpeza ne’e, kada loron ida sira hetan $5 no fulan ida hetan $100. Enkuantu ba supervizór loron ida hetan $7 no fulan ida hetan $140,” nia dehan.

Entretantu, tuir dadúz hosi Xefe Suku Bemori, Cristalina Perira Soares de Oliveira relata katak, komunidade ne’ebé hela iha Suku Bemori hamutuk 4859.

Programa Mão de Obra Postu Administrativu ne’e, liuhosi diploma Ministerial númeru 12/2021, 25 abríl, ne’ebé mai munisípiu hodi fó kompeténsia ba Postu Administrativu neen iha Munisípiu Dili mak implementa ho objetivu atu rekupera ekonómia iha situasaun pandemia COVID-19.

Programa Mão de Obra Postu Administrativu ne’e kada suku sei halo rekrutamentu ba traballadór hamutuk na’in-20 no hosi na’in-20 ne’e, na’in-19 traballadór no ida supervizór.

Iha Dili, ema ne’ebé atu servisu ba PMOPA ne’e hamutuk 1.880 entaun tenke rotativu entaun  kada fulan rekruta ema hamutuk 720, nune’e komunidade hotu-hotu iha suku laran bele hetan osan uitoan hosi PMOPA ne’e.

Programa PMOP ne’e rasik orsamentu ba kada postu administrativu ne’e hamutuk $5.000 ne’ebé Postu Administrativu neen, Metinaro, Ataúro, Don Aleixo, Nain-Feto, Cristo Rei no Vera-Crus ne’e hamutuk $30.000.

Notísia Relevante: Munisípiu Dili implementa MOPA hodi rekupera ekonomia

Jornalista : Nelia Fernandes

Editór       : Cancio Ximenes

Publisidade

Leave a Reply

Latest Post

error: Content is protected !!