EDUKASAUN, HEADLINE

MESSK no BNCTL asina akordu liña kréditu ‘Ensinu Superiór Kualidade+’

MESSK no BNCTL asina akordu liña kréditu ‘Ensinu Superiór Kualidade+’

Ministru Ensinu Superior Siénsia no Kultura, Longuinhos dos Santos no Diretór Ezekutivu BNCTL, Brígido de Sousa, asina akordu liña kréditu ‘Ensinu Superiór Kualidade+’, iha salaun Otél Novo Turismo, Bidau Lecidere, tersa (25/01). Imajen TATOLI/António Gonçalves

DILI, 25 janeiru 2022 (TATOLI)—Ministériu Ensinu Superior Siénsia no Kultura (MESSK) no Banku Nasionál Komérsiu Timor-Leste (BNCTL), tersa ne’e, asina akordu ba implementasaun liña kréditu ba Ensinu Superiór Kualidade+, nune’e garante kualidade universidade privadu sira.

Ministru Ensinu Superior Siénsia no Kultura, Longuinhos dos Santos, hateten, bainhira universidade privada akreditada hamutuk 16 hahú halo ona kréditu, Governu sei responsabiliza selu juru balun durante tinan-tolu to’o lima.

“Bainhira BNCTL aplika funan 8%, entaun 3% ne’e Governu maka responsabiliza nu’udar subsídiu ida ne’ebé ita fó hanesan garantia ida, enkuantu seluk responsabiliza hosi instituisaun sira ne’ebé sai kreditór,” Ministru relata iha salaun Otél Novo Turismo, Bidau Lecidere.

Notísia relevante: Governu kria liña kréditu ‘Ensinu Superiór Kualidade’

Ba inisiativa ne’e, la eziste limitasaun ba instituisaun ensinu superiór atu halo kréditu, maibé Governu bele garante tetu másimu to’o $500.000, ne’ebé ekivalente ho funan 3%.

“Prosedimentu kréditu ne’ebé Governu ho BNCTL konkorda maka garantia banku hodi deside fó juru kiik ba universidade sira atu halo kréditu,” nia akresenta.

Aleinde ne’e, Governu prevee ona millaun $5 iha BNCTL atu garante kréditu finanseiru.

Iha biban hanesan, Diretór Ezekutivu BNCTL, Brígido de Sousa, hateten, bainhira akontese mal paradu iha prosesu pagamentu kréditu,  banku sei ko’alia ho ministériu atu rekupera fali kréditu sira mai hosi fundu ne’ebé Governu garante ona.

“Ha’u fiar katak ida-ne’e sei la akontese, tanba taxa de jurus ne’ebé BNCTL oferese ne’e 3% kada tinan, nu’udar kréditu suave ka kréditu unifikadu hanesan mós eskema kréditu ne’ebé ami halo ho Ministériu Turizmu Komérsiu no Indústria (MTKI) ba atividade negósiu sira,” nia tenik.

Nune’e, BNCTL sei hein universidade 16 ninia proposta aplikasaun ba kréditu no sei halo analiza, atu haree proposta sira prienxe hotu rekizitu ka viavel mak bele kontinua fó kréditu liuhosi konkordánsia entre parte rua.

“BNCTL nu’udar banku estatál ne’ebé iha obrigasaun atu apoiu programa Governu, tanba ne’e konkorda apoiu inisiativa Governu hosi oferese juru kiik ba universidade sira atubele asesu kréditu hodi garante dezenvolvimentu iha setór infraestrutura no rekursu umanu,” nia dehan.

Rekizitu banku ba universidade sira, bainhira atu halo kréditu tenke prepara planu negósiu, tenke aprezenta relatóriu finansiál, tenke aprezenta kaixa kustu (osan tama ka sai), inklui seguransa katak kreditór iha osan sufisiente atu selu obrigasaun ba banku.

Nune’e mós, Reitór JSU, João Saldanha, konsidera inisiatiava ne’e di’ak tanba durante ne’e parte universidade sempre levanta kestaun kréditu ba deputadu no ministru sira.

“Akordu ne’e nu’udar pasu ida hodi loke dalan foun ba dezenvolvimentu iha instituisaun ensinu superiór privadu sira. Tanba ne’e, bainhira iha nesesidade atu hadi’a fasilidade, bele hahú ona prosesu kréditu ho juru kiik,” nia dehan.

Nia agradese tanba JSU tama lista akreditadu no disponível asesu kréditu bainhira iha nesesidade.

“Ami sei halo kréditu maibé la’ós agora, neineik ami sei ajusta-an hotu maka ami sei halo. Husik kolega sira ba uluk lai mak ami tuir. Karik ami halo kréditu, sei foku hadi’a infraestrutura iha kampus foun iha dolok oan,” nia akresenta.

Jornalista : Tomé Amado

Editora     : Julia Chatarina

iklan
iklan

Leave a Reply

iklan
error: Content is protected !!