DILI, 26 janeiru 2022 (TATOLI)—Portavóz Governu no Ministru Prezidénsia Konsellu Ministru, Fidelis Manuel Leite Magalhães, hateten, daudaun ne’e Governu halo hela esforsu hodi redús númeru moras dengue.
“Governu iha responsabilidade tenke sulusiona situasaun ne’e, tanba sente triste no preokupa ho kondisaun, entaun Governu halo hela esforsu lubun boot ida no Ministériu Saúde (MS) maka lidera esforsu hotu atu kombate dengue,” Ministru Fidelis Manuel dehan iha Palásiu Governu, kuarta ne’e.
Notísia relevante: Kazu dengue sa’e ba 835 no mate na’in-16
Diresaun Nasionál Saúde Publika liuhosi Departamentu Vijilánsia Epidemolojia MS rejista iha meadu janeiru ne’e kazu dengue hamutuk 901 no hosi númeru ne’e na’in-17 mak mate.
Nune’e, tuir governante ne’e, MS kontinua halo esforsu no nota katak hosi númeru sira ne’e labarik maka sai vítima.
“Entaun presiza intensifika liután esforsu hosi parte saúde no ita hotu halo esforsu boot liu hodi garante limpeza, tanba buat ne’ebé sai ameasa boot liu mai ita atu hetan moras dengue maka susuk. Tanba ne’e presiza limpeza fatin sira ne’ebé susuk fasil moris no esforsu kontrola,” nia akresenta.
MS informa ba ministru sira hotu kona-ba servisu ne’ebé halo no kontinua hodi kombate surtu, ne’ebé ba kestaun ne’e, MS koordena ho Ministériu Administrasaun Estatál (MAE) no ministériu seluk atu kontinua esforsu maka’as.
Maioria kazu dengue deteta hosi munisípiu Dili ho totál 604, Baucau iha kazu 44, Manatuto 57, Covalima 31, Ermera 71, Manufahi 44, Viqueque neen, Ainaro neen, Liquiçá sia, Aileu ualu no Bobonaro 21.
Enkuantu, númeru óbitu na’in-17 ne’e maioria labarik, kompostu hosi Dili sia, Ermera haat, Ainaro ida, Bobonaro ida no Covalima rua , nune’e totál Case Fatality Rate nível nasionál 1,9%.
To’o kuarta ne’e, postu administrativu Dom Alexo iha kazu 300, Cristo-Rei 118, Vera-Crúz 85, no Na’in Feto 92.
Aleinde ne’e, fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue 162, Klínika Fatumeta 88, sentru saúde Comoro 136, sentru saúde Vera-Crúz 47, sentru saúde Formosa 99, sentru saúde Becora 59, sentru saúde Ataúro haat, sentru saúde Metinaro lima, Klínika Bairro-Pité rua no Klínika Motael na’in-ida.
Jornalista : Antónia Gusmão
Editora : Julia Chatarina
