DILI, 28 janeiru 2022 (TATOLI)— Kandidatura Prezidente Repúblika Independente, Virgílio da Silva Guterres, informa segunda (31/01) hahu submete nia dokumentu hodi rejista iha Tribunál Rekursu atu kompete eleisaun prezidensiál ne’ebé sei realiza iha loron 19 marsu tinan ne’e.
“Ami nia planu deklara ha’u nia kandidatura iha segunda (31/1) dader, hafoin deklara hotu lokraik oras serbisu ami mai rejista kedan ha’u nia kandidatura iha Tribunál Rekursu,” Kandidatu Prezidente Repúblika ne’e hateten ba jornalista sira, iha Tribunàl Rekursu, sesta ne’e.
Notísia Relevante:Kandidatu Ramos Horta rejista ona iha Tribunál Rekursu
Nia dehan apoiante ka eleitór ne’ebé apoia nia kandidatura hamutuk 5.000-resin, hosi munisípiu 12 inklui Rejiaun Administrativu Espesiál Oé-Cusse no Ambeno (RAEOA).
“Preparasaun la’o di’ak, ami nia ekipa prepara ohin, aban no bainrua hatama apoiante sira ne’e ba dokumentu hard copy no soff copy hotu, nune’e segunda ami deklara ona,” nia afirma.
Nune’e, nia dehan presenza iha Tribunál Rekursu ne’e atu konfirma rekezitu ka dokumentu balun, hafoin mai rejista.
“Ohin, ami mai atu konfirma rekezitu balun hanesan formulariu aseitasaun ba ha’u nia kandidatura rasik no estatutu Atauro ne’e politikamente sai ona munisípiu, maibé kartaun eleitorál ami nia eleitór sira legàlmente sei hola parte iha munisípiu Dili,” Virgílio Guterres akresenta.
Notísia Relevante: Kandidatu Hermes Barros no Isabel Ferreira rejista iha Tribunál Rekursu
Jornalista : Natalino Costa
Editór : Florencio Miranda Ximenes
