DILI, 07 fevereiru 2022 (TATOLI)–Ministériu Edukasaun Juventude no Desportu (MEJD) no Sekretaria Estadu Formasaun Profisionál no Empregu (SEFOPE) hetan apoiu fundu hosi Governu Alemaña ho montante $280.000 hodi realiza formasaun ba formadór na’in-26.
“Ita realiza formasaun ne’e atu ajuda estudante sira deside rasik futuru bainhira ramata iha ensinu báziku terseiru siklu, bele iha ona nosaun hodi integra-an iha ensinu sekundáriu tékniku vokasionál hodi bele hetan matéria espesífiku,” Prezidente Instituto Nacional de Formação de Docentes e Profissionais da Educação de Timor-Leste (INFORDEPE) no Reprezenta MEJD, Manuel Gomes de Araújo, informa ba jornalista sira, iha salaun Ian Martin INFORDEPE, Balide, segunda ne’e.
Matéria ne’ebé formadór sira sei hetan hafoin divulga fali ba estudante sira maka empregu no orientasaun serbisu, ne’ebé kontinuasaun hosi formasaun ne’e, estudante sira sei hili estudu iha área profisionál hanesan otomotivu, karpintaria, pedreiru ka mekánika.
“Área sira hanesan ne’e, eskola ensinu sekundáriu tékniku vokasionál mak eziste, ne’e duni programa ne’e foin ba dahuluk realiza ba eskola sira ho intensaun atu ajuda hamenus dezempregu iha nasaun ne’e,” nia akresenta.
Nune’e mós, Asesór Empregu GIZ, Nuno Eugenio Goulard, hateten, Alemaña ninia kooperasaun ho Governu Timor-Leste la’o di’ak tebes atu ajuda timor-oan sira bele hetan kapasidade natoon iha área espesífiku sira hodi bele kompete iha merkadu traballu.
“Atividade hasa’e kapasitasaun ba joven sira nia hala’o beibeik ona. Maibé iha área eskola foin maka hahú. Governu Timor-Leste harii eskola tékniku barak maibé estudante sira hosi ensinu báziku, hafoin finaliza estudu iha sétimu anu ensinu baziku tersieru siklu, estudante ne’ebé tama eskola tékniku oituan liu. Ida-ne’e mós la tuir área ne’ebé sira hili,” nia dehan.
Nune’e, kooperasaun entre Governu Alemaña Timor-Leste liuhosi pontu importante rua maka tékniku no fundu, atu ajuda joven sira iha eskola báziku bele hetan informasaun adekuadu ba programa formasaun ne’e rasik.
Formasaun ne’e sei realiza hosi parte entidade rolu hanesan INFORDEPE, SEFOPE no parte eskola, ne’ebé daudaun iha ona eskola 10 maka tama ona alvu sai benefisiáriu programa, maibé seidauk bele fó sai ba públiku, tanba hafoin formasaun durante loron-haat ba formadór sira ramata ona maka foin bele públika.
Jornalista : Tomé Amado
Editora : Julia Chatarina
