DILI, 17 fevereiru 2022 (TATOLI)–Bee Timor-Leste, Empreza Públika (BTL, E.P), kinta ne’e, asina kontratu ho empreza Fuente de Éxito JV no Acelda, hodi implementa projetu estabelesimentu sistema fornesimentu bee-moos iha suku Mehara, postu administrativu Tutuala, munisípiu Lautém.
“Ita-nia enkontru ohin atu asina kontratu ho empreza rua atu halo sistema bee-moos ba ita-nia komunidade iha suku Mehara, ho totál populasaun 2.197 hosi uma-kain 473, ne’ebé durante ne’e la asesu bee-moos,” Prezidente Konsellu Administrasaun BTL, E.P, Carlos Peloi dos Reis, relata iha edifísiu Caicoli.
Notísia relevante: 74% populasaun Lautem asesu ona bee-moos
Inisiativa ne’e tanba empreza estatál ne’e halo levantamentu dadus iha tinan kotuk no konsege dezenvolve Bill of Quantity (BoQ), nune’e iha tempu badak empreza sei hahú serbisu iha terrenu.
Orsamentu ba projetu konstrusaun sistema fornesimentu bee-moos iha Mehara ne’e hamutuk $348.757,35.
Iha fatin hanesan, na’in ba empreza Fuente de Éxito, Ángelo da Silva, informa, bazeia ba kontratu, sei hahú loron 22 fevereiru 2022 no termina iha 22 jullu 2022, enkuantu ezekuta projetu ho durasaun fulan-neen.
“Ami prontu atu ezekuta tuir orientasaun ne’ebé mai hosi BTL, E.P no ohin asina ona kontratu, ami sei halo preprasaun atu tun ba terrenu, tanba suku Mehara ne’e iha aldeia tolu maibé ita foku ba aldeia rua hanesan Loiquero no Porlamento,” nia dehan.
Jornalista : Arminda Fonseca
Editora : Julia Chatarina
