25 fevereiru, CLN enserra programa seguransa alimentár iha Railaco

DILI, 22 fevereiru 2022 (TATOLI)—Prezidente Sentru Lojístiku Nasionál (CLN, sigla portugés) Jervazio Cardoso de Jesus da Silva, hateten, implementasaun programa seguransa alimentár ne’ebé la’o daudaun, tuir planu sei enserra iha postu administrativu Railaco, munisípiu Ermera, iha loron fulan-fevereiru nia laran.
“Progarama seguransa alimentár agora tama iha faze daruak, la’o hela iha munisípiu hotu, no tuir planu loron 25 fevereiru ita sei halo enserramentu iha Railaco,” Prezidente CLN hateten ba Agência TATOLI, iha ninia knaar fatin, Bebora, tersa ne’e.
Totál benefisiáriu ba programa seguransa alimentár ne’ebé implementa hosi CLN ne’e hamutuk 88.000, kompostu hosi faze dahuluk hamutuk 32.000 no faze daruak 56.000.
“Bainhira enserra programa seguransa alimentár, ba oin haree fali programa Cesta Bázika.
Notísia relevante: Governu aprova distribuisaun Cesta Bázika ba família rendimentu menus $500
“Maibé ida-ne’e sei hein orientasaun hosi Ministériu Koordenadór Asuntu Ekonómiku (MKAE). Ita prepara téknikamente atu fó apoiu MAKE atu implementa Cesta Bázika, tanba ita iha ona mata dalan ne’ebé di’ak durante simplementa eguransa alimentár inklui ho tinan kotuk implementa Cesta Bázika,” nia dehan.
Programa seguransa alimentár previstu iha Lei númeru 8/2021, 3 maiu, ne’ebé altera Lei númeru 14/2020, 29 dezembru, refere ba Orsamentu Jerál Estadu (OJE) 2021 no aprovasaun medida ba apoiu sósiu-ekonómiku.
Medida ne’e mosu, haree ba impaktu negativu hosi pandemia COVID-19 iha ekonomia nasionál, nune’e Governu propoin alterasaun ba lei 14/2020 ho medida foun oioin inklui medida seguransa alimentár.
Dekretu-lei ne’e fó kbiit ba Sentru Lojístiku Nasionál (CLN, sigla portugés), atu halo kontratu ho produtór lokál ho operadór komersiál sira seluk, hodi hetan ai-han nesesáriu.
Aleinde ne’e, dekretu-Lei ne’e fó atensaun espesiál ba ema no família sira ho rendimentu la liu $1,90 loron ida, ne’ebé atu define sé mak iha direitu ba apoiu espesiál ne’e, maka entidade responsável sira sei uza dadus hosi rejistu uma-kain idaidak iha suku sira hosi Ministériu Administrasaun Estatál (MAE) no Ministériu Solidariedade Sosiál no Inkluzaun (MSSI)
Nune’e, Ai-han ho valór $30 sei fó ba kada sidadaun ne’ebé rejista ona iha ‘Livru Rejistu Uma-kain’ nu’udar xefe família ka bainhira labele simu sei reprezenta hosi membru ida hosi uma-ain ne’e, ho otas 17 ba leten.
Produtu ne’ebé Governu oferese liuhosi programa ne’e hamutuk neen hanesan foos, batar, fore-mungu, koto, fore-metan no fore-rai.
Governu prevee orsamentu ba programa seguransa alimentár hamutuk millaun $12 no iha posibilidade CLN restoke ba armazen nasionál hodi halo intervensaun ba merkadu, nune’e bainhira mosu dezastre naturál, Governu iha kbiit atubele fó asisténsia ba komunidade afetadu, enkuantu restante sosa produtu lokál ne’ebé agrikultór sira kuda hodi halo distribuisaun.
Jornalista : Arminda Fonseca
Editora : Julia Chatarina

