DILI, 23 fevereiru 2022 (TATOLI)-Prezidente Repúblika, Francisco Guterres Lú Olo, husu ba Organizasaun Persaudaraan Setia Hati Terate (PSHT), atu kontribui ba Estadu hodi kria paz iha Timor-Leste, durante kampaña to’o eleisaun prezidensiál 2022.
Lú olo hato’o asuntu ne’e bainhira halo sorumutu ho membru PSHT, Joaquim Fernandes iha Palásiu Prezidensiál Nicolau Lobato Bairo-Pité Dili, kuarta ne’e.
“Prezidente Repúblika nia mensajen mak rai ne’e ita-hotu nian, disiplina tanba tempu badak ona eleisaun prezidensiál no hein katak festa demokrásia ne’e lao di’ak liliu hanesan sidadaun di’ak tenke kontribui ba Estadu,” Reprezentante membru PSHT, Joaquim Fernandes.
Nia esplika sorumutu ho Xefe Estadu ne’e, la reprezenta organizasaun PSHT, maibé reprezenta pesoál hodi hato’o agradesimentu ba Prezidente Repúblika Francisco Guterres Lú Olo tanba fó ona apoiu durante prosesu re-ativa grupu arte-marsiál iha rai-laran.
“Ami mai la’ós lori naran organizasaun PSHT maibé ami membru mai ho individualmente atu agradese Prezidente Repúblika nia tulun durante prosesu re-ativa organizasaun PSHT no organizasaun arte marsiál sira seluk ne’ebé antes Governu deside taka,”Nia hateten
Jornalista: Nelson de Sousa
Editór: Agapito dos Santos
