iklan

HEADLINE, SEGURANSA

SEPS koordena ho MS fó tratamentu médiku ba vítima inundasaun

SEPS koordena ho MS fó tratamentu médiku ba vítima inundasaun

Vítima inundasaun ne’ebé daudaun hela iha sentru akollimentu provizóriu Dom Boscao Comoro, tersa 22/2/22. Imajen TATOLI/António Dasiparu

DILI, 22 fevereiru 2022 (TATOLI)— Sekretária Estadu Protesaun Sivíl (SEPS), hala’o koordenasaun ho Ministériu Saúde (MS) atu fó tratamentu saúde ba vítima inundasaun hamutuk uma-kain 90 iha sentru akollimentu Dom Bosco.

“SEPS mós koordena ho Ministériu Saúde, daudaun ne’e koloka ona pesoál saúde sira iha sentru akollimentu provizóriu Dom Bosco, atu fó atendimentu saúde ba inan isin rua labarik sira inklui ferik no katuas sira,” Sekretáriu Estadu Protesaun Sivíl (SEPS) foun, Joaquim José Gusmão dos Reis, hateten ba Jornalista sira iha knaar fatin Caicoli, kuarta ne’e

SEPS rejista vítima inundasaun iha mota Comoro hamutuk uma-kain 90 ho totál ema na’in-290 ne’ebé maioria inan isin rua, labarik, ferik no katuas ne’ebé daudaun hela iha sentru akollimentu Dom Bosco Comoro.

“Kuandu ita evakua komunidade  ne’e durante oras 72, tuir lei ami fó kedan apoiu hahán ba sira kompostu hosi matabisu, han meudia no han kalan. Hafoin to’o loron tolu mak viítima sira ne’e seidauk fila ba sira nian fatin, entaun ita fó hahán matak  mak sira  jere rasik,” SEPS Joaquim afirma.

Komunidade ne’ebé hela iha mota-ninin no mota-laran área Comoro kontinua hetan inundasaun hafoin udan-boot iha foho Kasnafar no Aileu, segunda, 21/2/2022.Imajen TATOLI/António Dasiparu

SEPS hamutuk Cruz Vermella Timor-Leste (CVTL), Australian Humanitarian Participate no parseiru sira seluk apoia esponza ba inan isin rua, labarik, ferik no katuuas sira hodi bele toba.

Nune’e, SEPS agradese ba Amo sira iha Dom Bosco Comoro tanba bele koopera ho Governu hodi simu vítima dezastre naturál atu hela provizóriu iha ne’ebá.

Daudaun ne’e ekipa SEPS iha ona terenu hodi halo identifikasaun ba uma komunidade sira ne’ebé hetan estragu kauza hosi inundasaun.

“Ami rekolla dadus ba uma estragu hosi mota liuliu ba uma sira ne’ebé hetan estragu grave, atu ita bele fó apoiu emerjénsia hanesan kalen, besi no seluk tan,” tenik nia.

Kona-ba vítima ne’ebé hela iha mota laran, Joaquim Gusmão husu atu komunidade hirak ne’e husik ona fatin rísku sira.

“Ita mós husu atu komunidade sira labele hela tan iha fatin risku sira hanesan ne’e no bainhira sira hakarak husik fatin ne’e SEPS mak sei fó apoia rekuperasaun ba vitíma sira ne’e, imporante vítima sira mak buka fali fatin seluk atu hela. Karik sira lakohi hela ona iha Dili, ami koordena ho Ministériu Administrasaun Estatál (MAE) no ita nian Autoridade Munisípiu hodi lori sira fila ba sira nian munisípiu,” nia rekomenda.

Notísia relevante: SEPS apoia hahán ba vítima inundasaun iha área mota Comoro

Jornalista: Natalino Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!