Top

Kuarezma nu’udar tempu peniténsia ba sarani katóliku

Madre ida marka hela ahu-kdesan ba Labarik feto ida nia reen-to'os bainhira partisipa iha misa kuarta feira sinzas iha Igreja Maria Auxiliadora Comoro, Imajen TATOLI/Antonio Goncalves.

DILI, 02 marsu 2022 (TATOLI)— Padre Pároku Ai-Mutin, Emanuel Lelo Talok, hateten kuarezma hanesan loron 40 ne’ebé hahú iha kuarta-feira sinza to’o domingu-páskua, tempu peniténsia no karidade ba sarani katóliku-sira.

Iha omilia amu pároku ne’e hatete saranik katóliku iha Timor-Leste no mundu, ohin, selebra misa kuarta feira sinza, hosi ne’e sarani-sira hahú prepara aan halo jejún ka abstinensia durante loron 40 nian laran.

“Iha loron 40 nia laran ita ida-idak tenke halo reflesaun ba ita nia aan, liuhosi halo halo orasaun no hader aan tuir santa kreda haruka, hakribi sala sira hodi fiar iha evanjellu. Tempu kuarezma ne’e mós fó ba ita, atu oinsá halo karidade ba malu, tulun malu liuhosi asaun saida deit, liuliu tulun ba maluk sira ne’ebé presiza ita nian tulun, fó  ba sira ne’ebé presiza ita nia tulun,” Amu Pároku Emanuel hateten bainhira prezide misa kuarta feira sinza iha igreja Ai-Mutin, kuarta ne’e.

Amu Pároku ne’e dehan, ahu-kdesan ne’ebé mak sarani sira simu nuudar simbolu “ita ema moris hosi rai sei fila ba rai”

“Tanba ne’e, orasaun no karidade nuudar instrumentu fiar kreda-katóliku nian, bainhira ita hasoru mate hodi manán moris rohan la’ek nian, ida ne’e mós bele sai fatór ida hodi lori ita nia espiritu ba moris rohan la’ek,” Amu haklaken.

Amu observa tempu agora sarani barak mak ladun tau fiar ba vida espirituál nian, tanba ne’e liuhosi tempu kuarezma ida ne’e, husu sarani atu halo reflezaun hodi hasa’e orsaun hodi hafoun fiar ne’ebe mak iha.

“Iha tempu ida ne’e, ita presiza halo reflezaun, liu hosi orasaun sira, nune’e haforte fali ita nian fiar ba Nai-Maromak tuir doutrina Nai-Maromak nian,” Padre ne’e fó hanoin.

Tanba, nuudar ema kriatura hosi Maromak nian, laiha ema ida moris permanente iha mundu ida ne’e tanba loron ruma hotu-hotu sei mate.

Husu ba sarani sira liuhosi tempu jejún ida ne’e, presiza halo reflezaun no karidade, nune’e fila ba Maromak karik ita-nia espiritu bele hetan moris di’ak no moris rohan la’ek.

“Loos katak ita nian isin lolon presiza ai-han, maibe ita mós labele halauhan ita nian espiritu, ita tenke fó han mós, liuhosi halo orasaun no rona Nain nia futar-lia iha loron domingu,” Amu Pároku ne’e akresenta.

Notísia relevante: Don Virgílio: “Tempu kuarezma presiza halo di’ak la’ós halo propaganda”

Jornalista: Natalino Costa

Editór       : Florencio Miranda Ximenes

Publisidade

Leave a Reply

Latest Post

error: Content is protected !!