Abitante ne’ebé konstrui uma besik mota Becora prontu koopera ho Governu

DILI, 03 marsu 2022 (TATOLI)—Xefe Departamentu Jestaun no Merkadu, Arthur Henriques, informa abitante ne’ebé halo uma besik mota Becora prontu koopera ho Governu bainhira Ministériu Obras Públika (MOP) atu loke ka halo luan estrada.
Notísia Relevante: AMD fó xamada atensaun ba ema-ne’ebé konstrui uma besik mota Becora
“Ami ba rezolve ona ho sidadaun ne’e tanba nia iha dokumentu rai nian, ne’ebé nia fó ba ema Indiano ne’e halo nia atividade negósiu provizóriu de’it. Maibé nia mós konkorda kuandu Governu hakarak halo dezenvolvimentu ruma, nia prontu atu fornese. Maibé provizóriu nia iha surat ba rai ne’e,” Arthur Henriques hateten ba Agência Tatoli, via telefónika, kinta ne’e.
Bainhira rona ema halo uma besik mota Becora, Autoridade Munisípiu Dili liuhosi Departamentu Jestaun no Merkadu, tun direta ba haree kedan tanba fatin ne’e risku, no aleinde ne’e Governu liuhosi Ministériu Obras Públika sukat ona atu loke tan Estrada iha parte ne’ebá.
“Rai na’in promote katak nia halo ona deklasaun karik Governu presiza nia prontu atu fornese rai ne’e,” nia esplika.
Xefe Suku Becora, Postu Administrativu Cristu Rei, Munisípiu Dili, Antonio da Silva Soares, hateten Indiano ne’ebé halo nia atividade negósiu ne’e ema-nia rai privadu mak nia aluga.
“Iha momentu ne’ebá, bainhira rona informasaun ne’e ami ba ko’alia kedas no sira dehan aban bainrua mota sobu karik sira sei la husu Governu atu ganti rugi. Tanba ne’e, ba oin sé mak husu atu halo uma besik mota ninin ita sei la fó,” autoridade lokál ne’e hateten.
Nia hatutan, durante ne’e nia parte fó ona informasaun sira ne’e ba xefe aldeia sira atu haree ema sira-ne’ebé halo uma besik mota ninin, tanba xefe aldeia sira mak besik liu bá povu.
“Ne’ebé, ha’u fó hateten ba sira katak labele halo uma iha mota ninin no rai ne’ebé risku, tanba bele fó risku ba sira-nia moris,” nia dehan.
Jornalista : Nelia Fernandes
Editór : Cancio Ximenes

