EKONOMIA, HEADLINE, INTERNASIONÁL

ANPM publika dokumentu empreza hitu konkore lisensiamentu petrolíferu bloku 18

ANPM publika dokumentu empreza hitu konkore lisensiamentu petrolíferu bloku 18

Ministru Petróleu no Minerál, Victor da Conceição Soares akompaña hosi Diretór Peskiza no Promosaun ANPM, Mateus da Costa, halo abertura ba kompañia ne'ebé aplika konkore lisensiamentu petrolíferu bloku 18, iha salaun Novo Turismu, Bidau Lecidere, sesta (04/03). Imajen TATOLI/Francisco Sony

DILI, 04 marsu 2022 (TATOLI)–Autoridade Nasionál Petróleu no Minerál (ANPM), sesta ne’e, halo seremónia abertura ba dokumentu empreza ne’ebé konkore iha lisensiamentu petrolíferu bloku 18, kompostu hosi 11 iha tasi-laran no hitu iha rai-maran.

Diretór Peskiza no Promosaun iha ANPM, Mateus da Costa. Imajen TATOLI/Francisco Sony

Diretór Peskiza no Promosaun iha ANPM, Mateus da Costa, hateten, publikasaun dokumentu empreza ne’ebé hola parte prosesu konkursu públiku, antes ne’e fó sai iha loron 24 janeiru no to’o ohin tuku 16:00 lorokraik hanesan data ikus atu taka submisaun dokumentu.

“Nune’e, tuku 18:00 ita hahú loke dokumentu sira ne’e ba públiku, ho rezultadu submisaun dokumentu, to’o tuku 16:00 bainhira ita taka, iha empreza hitu halo aplikasaun mai,”Diretór hateten iha Otél Novo Turismo, Bidau Lecidere.

Notísia relevante: ANPM taka submisaun pré-kualifikasaun konkursu públiku petrolíferu bloku 18

Empreza hitu ne’ebé halo aplikasaun kompostu hosi lima hosi internasionál no rua hosi nasionál hanesan Timor Gás no Petróleu, Empreza Públika (Timor GAP, E.P) no ETO, Lda.

Mapa bloku 18. Imajen/ANPM

“Empreza sira ne’ebé hatama sira-nia dokumentu mai, aplika ba bloku tasi-laran tolu mak hanesan bloku P, R no N no iha rai-maran iha bloku A, B, F. Maibé hosi empreza hitu ne’e iha bloku balun mak empreza sira halo kompetetivu tebes, hanesan iha tasi-laran bloku R, iha empreza rua mak halo aplikasaun rai-maran bloku F, empreza tolu mak kompete, tantu empreza internasionál nasionál,” nia akresenta.

Empreza tolu ne’ebé kompete ba rai-maran iha bloku F mak hanesan, ETO, Lda, HTS Exploration Ltd, no Timor GAP, E.P, no tasi-laran ba bloku R, empreza rua ne’ebé kompete mak Santos no Supernova Energy B.V, nune’e empreza rua seluk ne’ebé la kompete aplika ba tasi-laran hotu mak hanesan empreza internasionál hanesan Dravida Petroleum DMCC ba bloku N no empreza ENI ba bloku P.

Empreza hitu submetidu konkorre konkore lisensiamentu petrolíferu bloku 18. Imajen TATOLI/Francisco Sony

“Tanba ne’e, ba empreza sira ne’ebé halo aplikasaun kompete ba bloku ida de’it, ba oin ekipa evaluasaun mak sei haree sira-nia programa ne’ebé di’ak liu mak sei hetan pontu boot, maibé iha bloku balun ne’ebé empreza rua ka tolu kompete ne’e ba oin ekipa hili ida, maibé bainhira sira interese hotu, ita bele fó oportunidade hodi forma ekipa ida hakat ba oin,” Diretór esplika.

Seidauk define vensedór

Diretór Mateus da Costa dehan, hosi empreza hitu ne’e sei haree sira-nia programa bainhira halo perfurasaun posu ka lae, tanba normalmente iha prosesu peskiza explorasaun ne’e, iha tinan dahuluk iha faze tolu ne’ebé mak presiza halo hanesan estudu públiku, bainhira konsege halo prosesu levantamentu dadus hodi haree karik iha programa perfurasaun posu, mak sei halo atividade ne’e.

“Entaun ohin ne’e ita foin haree hanesan konkursu karik empreza hira mak tama no ita seidauk hatene empreza sé mak manán ba bloku ida ne’ebé, entaun ohin ita loke ekipa internál evaluasaun tékniku hosi ANPM ninian, ne’ebé mai ho ninia kapasidade sei halo evaluasaun hodi fahe ekipa tékniku no haree ba parte tékniku nian no komersializasaun sei haree ba área komersiál nian,” nia esklarese.

Ministru Petróleu no Minerál, Victor da Conceição Soares akompaña hosi Diretór Peskiza no Promosaun ANPM, Mateus da Costa, halo abertura ba empreza ne’ebé aplika konkore lisensiamentu petrolíferu bloku 18, iha salaun Novo Turismu, Bidau Lecidere, sesta (04/03). Imajen TATOLI/Francisco Sony

Hosi ne’e, idaidaik iha ninia pontu méritu ne’ebé tau hamutuk hodi haree empreza ne’ebé mak nia pontu boot liu mak sei konkorre.

“Nune’e, rezultadu ita sei fó sai iha loron 15 abril 2022, ne’ebé empreza ohin ne’e bainhira manan sei ba fura mina iha bloku ne’ebé ita seidauk hatene, tanba ohin ne’e empreza sira ne’ebé hatama sira-nia dokumentu mai aplika ba bloku neen,” nia informa.

Empreza hitu agora prinxe hotu ona kritériu hanesan kualifikasaun tékniku no finanseiru, ne’ebé agora haree de’it ba empreza ne’ebé mak nia programa di’ak liu mak hakat ba oin.

Antes ne’e, empreza 15 mak iha interese kompete halo investimentu iha petrolíferu bloku 18, maibé empreza 13 mak pre-kualifikadu, enkuantu empreza rua labele tanba nia seidauk prienxe kritériu.

“Hosi empreza 13 ne’e, iha hitu ne’ebé aplika, maibé ita agradese ona,” Diretór ne’e tenik.

Iha loron 03 outubru 2019, Primeiru-Ministru, Taur Matan Ruak, lansa konkursu publiku ba mina no gás hamutuk bloku 18, kompostu hosi 11 iha tasi laran no hitu iha rai maran.

Tuir planu antes ne’e, lisensiamentu konkursu públiku segunda ronda sei termina iha loron 01 outubru 2021, maibé ANPM deside hodi mantein atu la’o tuir lala’ok indústria mina no gás nian, hodi extende konkursu, nune’e bele fó oportunidade no tempu ba kompaña mina internasionál no nasionál hodi prepara dokumentu no submisaun ba konkursu ne’e.

Durante tinan 2020 no 2021, ANPM hamosu estratejia foun hodi halo promosaun ba lisensiamentu ne’e hodi organiza konferénsia balun hanesan Simeira Energia Timor Leste ba daruak iha tinan 2020 no Simeira Enerjia Timor-Leste ba datoluk iha tinan 2021 liuhosi virtuál no fórum ida ne’ebé foka ba nasaun Timor Leste.

Nune’e mós, iha tinan ne’e nia laran, ANPM sei partisipa iha eventu lubuk ida hodi halo promosaun ba lisensiamentu segunda ronda, hanesan NAPE no OTC 2021, ADIPEC 2021 no African Oil Week 2021.

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!