DILI, 09 marsu 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova Projetu Proposta Lei alterasaun daruak ba Lei númeru 10/2004, loron 24 novembru kona-ba Lei Sistema Saúde, ne’ebé aprezenta hosi Ministra Saúde, Odete Maria Freitas Belo.
“Alterasaun ne’e loke dalan di’ak liután atu sidadaun sira hotu hetan vasina no bele hetan asesu ba fasilidade sira, nune’e obrigatóriamente tenki iha vasina,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: PN altera lei sistema saúde iha finál globál
Hafoin elabora redasaun finál, proposta alterasaun lei ne’e sei haruka ba Parlamentu Nasionál.
Lei Sistema Saúde atuál, aleinde alterasaun dahuluk ne’ebé halo liuhosi Lei númeru 24/2021, loron 19 novembru, ho limitasaun ne’ebé presiza atu fó ba ordenamentu jurídiku no norma sira ne’ebé sei permite resposta adekuada ba pandemia ne’ebé kauza hosi vírus SARS CoV-2.
Enkuantu, iha situasaun ne’ebé la inklui iha kuadru exesaun konstitusionál Estadu Emerjénsia nian, sei presiza alterasaun, hodi nune’e bele hatudu kuadru sistema foun, hodi hein katak lei ne’ebé daudaun ne’e revee, bele sai instrumentu orientadór ne’ebé bele asegura timor-oan sira ho promosaun no protesaun saúde ne’ebé di’ak liu.
Jornalista : Antónia Gusmão
Editora : Julia Chatarina
