COVID-19: kazu detetadu pozitivu na’in-rua no ativu 57
DILI, 14 marsu 2022 (TATOLI)— Ministériu Saúde relata, kazu detetadu pozitivu foun na’in-rua, rekuperadu hitu no kazu ativu 57.
“Ohin kazu detetadu foun rua, rekuperadu hitu no kazu ativu 57,” hateten Diretora Jeral Presstaun Saúde Odete da Silva Viegas liuhosi nota ne’ebé Agência TATOLI asesu, segunda ne’e.
Nune’e, hahú 21 marsu 2020 to’o 14 marsu 2022 iha kumulativu kazu konfirmadu 22.793 no óbitu 129.
Hosi horisehik mai ohin, Laboratóriu Nasionál Saúde halo teste PCR 63 kompostu vijilánsia sentinela ida, rastreiu ba kontaku laiha, rastreiu aleatóriu rua, viájen internasionál 60 no follow up iha kuarentena laiha.
Alende ne’e, totál teste PCR ne’ebé halo iha 13 marsu 2022 iha munisípiu-sira seluk, Rejiaun Administravu Espesiál Oé-Cusse no Ambeno (RAEOA) no Hospitál Nasionál Guido Valadares (HNGV) 99 hanesan Maubisse laiha, Maliana laiha, Viqueque laiha , Suai 17, Baucau ida, Ermera laiha , RAEOA 16, HNGV 73, Lautém laiha, Vera Cruz laiha no Manufahi laiha.
Populasaun elijível tinan 18 ba leten, ne’ebé simu ona vasina to’o iha loron 13 marsu 2022, tuir sistema informasaun Saúde iha Ministériu Saúde, hanesan kumulativu 1ª doze iha Dili (88,8%) no kumulativu 2ª doze iha Dili (83,4%).
Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 85,0% no simu ona doze daruak 72,3%.
Hosi insidénsia COVID-19 iha Timor-Leste, durante loron hitu ikus maka 0,3/100 mil abitante.
Iha loron 14 marsu 2022 , izolamentu Vera-Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu tolu, baixa ho COVID-19 hamutuk tolu.
Notísia Relevante:COVID-19: kazu detetadu pozitivu na’in-rua no ativu 62
Jornalista: Felicidade Ximenes
Editór : Florencio Miranda Ximenes
