Observadór CPLP apela ba povu TL partisipa eleisaun prezidensiál 2022
DILI, 18 marsu 2022 (TATOLI)—Xefe delegasaun observadór hosi Comunidade Países Língua Portuguesa (CPLP), José Guerreiro Alves Primo, apela ba povu Timor-Leste (TL) atu partisipa másimu iha eleisaun prezidensiál ne’ebé hala’o iha loron 19 marsu 2022.
“Ami-nia solidariedade ba povu Timor-Leste no mensajen ba povu Timor-Leste enkoraja partisipa másima iha eleisaun prezidensiál tanba povu nia votu mak soberanu aas liu entaun sei hili kandidatu ne’ebé loos atu lidera nasaun. Fó apoiu tomak espera eleisaun ne’e sei di’ak liután ho eleisaun sira liu ba,” Xefe Delegasaun CPLP ne’e hateten, ba jornalista sira hafoin ramata sorumutu ho Prezidente Repúblika, Francisco Guterres Lú Olo, iha edifísu Palásiu Prezidensiál Nicolau Lobato, Bairu Pite, sesta ne’e.
Durante sorumutu ekipa delegasaun hato’o sira-nia prezensa hanesan observadór ba eleisaun prezidensiál eleisaun iha TL ba Xefe Estadu.
“Objetivu enkontru ne’e atu manifesta ami-nia prezensa iha territóriu atu fó solidariedade CPLP kada Estadu membru ba povu Timor-Leste,” nia dehan.
Hanesan ekipa observador hodi observa prosedimentu autoridade Timor-Leste ba realizasaun prosesu eleitorál tuir prosedimentu no lei ne’ebé iha ho loos no demokrátiku hodi garante transparánsia.
Nia dehan, tuir observasaun durante kampaña jeralmente nota katak la’o di’ak partisipa másimu hosi sidadaun no joven no espera kondús nafatin pás ho estabilidade iha loron eleisaun 19 marsu 2022 sai susesu eleisaun ba demokrásia nasaun nian.
Nia observa mós Timor-Leste garantia demokrásia tanba kandidatu kompete eleisaun iha feto mós iha no foinsa’e barak, nune’e ekipa delegasaun haree progresu di’ak ba demokrásia.
Enkuantu, kompozisaun membru observadór CPLP hamutuk na’in-16 ne’ebé reprezenta hosi Estadu membru nasaun CPLP hotu.
Jornalista : Nelson de Sousa
Editór : Cancio Ximenes
