DILI, 21 marsu 2022 (TATOLI)–Kandidatu Prezidente Repúblika (PR) independente ba períodu 2022-2027, ho númeru sorteiu 08, Tenente Jenerál reformadu, Tito da Costa Cristóvão ‘Lere Anan Timur’, apela ba apoiante sira atu simu rezultadu Eleisaun Prezidensiál 2022 ne’ebé hala’o ona iha 19 marsu.
“Ha’u apela ba militante sira, tanba sira sente la konfortável, maibé ha’u dehan ha’u komprernde, nasaun ida-ne’e ita mak harii, ita mak tenki haburas tanba ida-ne’e mak laiha problema. Ha’u rasik fakar ran ba ida-ne’e no nasaun ida-ne’e. Ne’ebé ita sei serbisu hamutuk maibé ita-nia demokrasia tenki buras, maibé la’ós buras fali ho osan, labele buras ho lia bosok maibé tenki ho lia-loos, ida ne’e maka furutu sai di’ak,” Lere Anan Timur hateten iha nia rezidénsia, Farol, segunda ne’e.
Notísia relevante: Taur komprimenta Lere iha rezidénsia Farol
Kona-ba preokupasaun públiku kona-ba Lere pozisaun polítika iha loron hirak tuir mai, Tenente Jenerál reformadu ne’e apela ba unidade nasionál, dame, armonia, respeitu no mós ba líder tomak atu hadomi malu nafatin.
“Ha’u kolen, foin daudaun ha’u mesak de’it mak la’o hanesan baibain, ha’u dehan ha’u oan-kiak ne’ebé la’o mesmesak, entaun ha’u kolen ne’ebé husik ha’u hanoin lai,” Lere akresenta.
Biban ne’e, Lere agradese ba parte hotu ne’ebé fó ona sira-nia apoiu ba nia kandidatura.
Jornalista : Antónia Gusmão
Editora : Julia Chatarina
