DILI, 22 marsu 2022 (TATOLI)—Ministru Obra Públika (MOP), Abel Pires, hateten sei tau antensaun rekupera estragu infraestrutura impaktu hosi dezastre naturál.
“Sei fó prioridade mak rekuperasaun hosi kalamidade no importante oinsá halo prevensaun iha tempu oin ba estragu iha infraestrutura,” Abel Pires hateten ba jornalista sira hafoin simu pose nu’udar Ministru Obra Públika hosi Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, tersa ne’e.
Mezmu asume knar hanesan ministru ho mandatu tinan ida ho balun de’it, nia sei hala’o servisu sira mak prioridade oinsá atu aselera esforsu tomak iha ministériu nia laran hodi servi di’ak liután povu no haree projetu estratéjiku sira hodi kontinua saida mak iha ona.
Abel Pires antes ne’e hanesan Deputadu PLP no asume Prezidente Komisaun E trata asuntu infraestrutura ne’ebé troka Ministru sesante MOP, Salvador Pires.
Antes ne’e, iha kinta (10 marsu) ne’e, Primeiru Ministru, Taur Matan Ruak, orienta ba ministériu relevante hamutuk ho orgaun sira-ne’ebé toma konta ba infraestrutura atu aselera rekupera estragu sira impaktu hosi dezastre naturál.
Xefe Governu husu ne’e bainhira lidera direta enkontru alargada ho Konsellu Administrasaun Fundu Infraestrutura (KAFI), Vise Primeiru no Ministru Planu no Ordenamentu Interinu, Rui Gomes, Ministru sesante Obra Públika Salvadór Eugenio Dos Reis Pires, Ministru Transporte no Komunikasaun, José Agustinho da Silva no Ajénsia Dezenvolvimentu Nasionál (ADN).
Xefe Governu preokupa ho progresu rekuperasaun estragu infraestrutura impaktu dezastre naturál, tanba haree ba ezekusaun iha verba fundu infraestrutura atinje de’it 26% iha tinan kotuk.
Nune’e, PM Taur orienta ba Ministru ne’ebé toma konta ba área infraestrutura nian atu hamutuk KAFI no AND atu rezolve kestaun sira ne’e iha tempu badak nia laran.
Enkuantu, Ministériu Obra Públika identifika estragu sira durante dezastre naturál iha loron 04 abríl 2021 hamutuk 117 iha teritóriu laran tomak kompostu hosi estragu simples 40 no estragu komplexu 77, ho estimasaun kustu pur volta millaun $245.
Servisu emerjénsia ne’ebé tama nível kompleta ona ka atinje 100%, toma konta hosi empreza 37, ne’ebé projetu ualu deside halo serbisu normalizasaun voluntariamente, enkuantu seluk ho pagamentu no daudaun finaliza ona.
Servisu emerjénsia nível rua hamutuk ualu, balun kompleta, balun ein progresu no seluk iha faze preparasaun.
Estrada Kampung Alor kompleta 100%, ne’ebé projetu haat ninia prosesu iha Ajénsia Dezenvolvimentu Nasionál (ADN), ida Ponte Becusse iha prosesu preparasaun, ida Cantilever Ponte CPLP tama ona konkursu no ida Ponte Loes tama iha Unidade Jestaun Projetu (PMU, sigla inglés).
Servisu emerjénsia nível tolu hamutuk 17 iha faze investigasaun no preparasaun dezeñu, projetu rua haruka ona ba ADN, ne’ebé projetu 15 mak verifika ona no submete ba Konsellu Administrasaun Fundu Infraestrutura (KAFI), no servisu emerjénsia nível haat sei iha faze planeamentu.
Iha Orsamentu Jerál Estadu (OJE) 2022, Governu mós prevee ona orsamentu iha fundu infraestrutura hamutuk millaun $332 ba projetu kuaze 700-resin.
Jornalista : Nelson de Sousa
Editór : Cancio Ximenes
