Top

TDD aplika pena admoestrasaun ba arguidu-sira ne’ebé perturba prosesu votasaun

Kontajen votu. Imajen Tatoli/António Dasiparu.

DILI, 22 marsu 2022 (TATOLI)— Tribunál Distritál Dili (TDD), tersa ne’e (22/2), liuhosi juis singular deside aplika pena admoestrasaun (hukuman peringatan) ba arguidu O no T komete krime perturbasaun prosesu votasaun iha sentru votasaun paralelu, Institutu Nasionál Administrasaun Públiku (INAP)-Comoro, sábadu (19/3).

Tribunál kondena pena ne’e tanba konsdiera faktu sira la aprovadu katak arguidu na’in-rua mak organiza ema hodi halo perturbasaun. Maski nune’e TDD deside arguidu na’in rua selu kustu judisiáriu ho montante kada arguido $10.

Tanba MP akuza arguidu na’in-rua ba pratika krime perturbasaun aktu eleitorál ne’ebé previstu iha artigu 235, númeru 1 hosi kódigu penál Timor-Leste.

Iha prosesu julgamentu sumariu ne’e, juís singular lee sai katak, iha loron 19 marsu 2022, tuku 13:45 otl, Iha sentru votasaun paralelu INAP Comoro, arguido na’in-rua  haloperturbasaun iha fatin votasaun tanba la simu bainhira haree naran laiha lista hosi Sekretáriadu Tékniku Adminsitrativu Eleitorál (STAE) atu ezerse direitu votu.

Hafoin rona tiha akuzasaun sira ne’e arguidu na’in-rua rekoñese katak sira rua halo aktus ne’e, tanba bainhira atu ezerse sira nia direitu iha sentru votasaun paralelu iha INAP, maske sira rejista ona iha STAE,maibé naran la sai iha lista.

Tanba ne’e mak arguidu nain-rua halo asaun protesta hasoru Brigada STAE nian iha sentru votasaun refere no ema seluk mós tuir sira halo protesta hodi impede prosesu votasaun.

“Maski, ami protesta iha sentru votasaun, maibé ami la halo asaun ruma iha sentru votasaun,” arguidu sira hateten.

Iha fatin biban hanesan, sasin Luis Tilman nu’udar membru PNTL ne’ebé destaka iha sentru votasaun paralelu INAP Comoro, hateten momentu nia ho nian maluk nain-rua maka halo seguransa iha sentru votasaun paralelu INAP, maibé arguidu nain O no T ba atu tuir votasaun, maibé  laran la sai iha lista hodi hamosu protestu.

Nune’e, nia dehan arguidu nain-rua fila ba uma no iha parte lokoraik sira mai fali kontinua halo protesta hodi ko’alia barak no husu fiskál sira nia esplikasaun  tanba sidadaun hakarak vota, maibé  naran laiha lista.

“Ho kestaun ne’e, arguidu sira ameasa katak se ami la tuir vota entaun urna fiskál labele lori hosi fatin ne’e ho hahalok arguidu sira nia halo votante barak konsege hamriik taka tiha fatin votasaun, nune’e difikulta votante seluk labele vota,” nia afirma.

Haree ba situasaun ne’e, nia afirma nuudar membru PNTL halo kontaktu kedan ba Komandu PNTL Munisípiu Dili atu halo intervensaun ba situasaun ne’e no konsege lori arguidu nain-rua ba Komandu PNTL Munisípiu Dili.

Ministériu Públika husu ba Tribunál atu aplika pena prizaun tinan ida ba arguidu nain-rua, tuir artigu 235, númeru 1 hosi Kódigu penál Timor-Leste, tanba hahalok arguidu nain-rua konsidera halo ameasa no perturbasaun ba atividade eleisaun nia.  Nune’e, MP husu bele fó hanoin ba arguidu labele halo tan kazu hanesan iha tempu tuir mai.

Entretantu, Defeza arguidu nain-rua husu Tribunál atu tetu didi’ak Ministériu Públiku nian rekomendasaun ne’e, tanba arguidu sira atu ba ezerse direitu iha sentru votasaun ne’ebé tinan lima dala ida no haree arguido sira lahalo perturbasaun no krime ruma.

Hafoin rona tiha parte hotu Tribunál deside aplika pena admoestrasaun no arguidu sira selu kustu judisiáriu kada ema $10.

Audénsia Julgamentu ne’e prezide hosi  juís sigular Ersiliade Jesus, Ministériu Públika reprezenta hosi  Prokuradór José Elo no Arguidu nain-rua hetan asisténsia legál hosi Advogadu Privadu Arnaldo no Ismael.

Notísia relevante: PNTL rejista kazu krime eleitorál ualu durante eleisaun prezidensiál

Jornalista : Natalino Costa

Editór        : Florencio Miranda Ximenes

Publisidade

Leave a Reply

Latest Post

error: Content is protected !!