Arsebispu Arkidioseze Dili-sarani sira hasa’e orasaun pás ba Ukraina-Rusia

DILI, 25 marsu 2022 (TATOLI)–Arsebispu Arkidioseze Metropolitana Dili, Don Virgílio do Carmo da Silva, SDB, hamutuk ho sarani sira iha Timor-Leste, sesta ne’e hasa’e orasaun pás ba Ukraina no Rusia bazeia ba orientasaun hosi Papa Francisco iha Roma.
“Ohin dadeer ne’e, ita reza tanba antes ida-ne’e ita haruka ona konvite ida hodi konvida ita-nia na’i-ulun sira no embaixadór lubuk ida-ne’ebé ohin dadeer mós mai hamutuk ho sarani sira no Santo Padre ita halo orasaun ida, tanba Santo Padre rasik mak haruka orasaun ne’e mai atu reza hamutuk ho sarani fiar na’in tomak no kreda tomak iha mundu rai klaran atu reza ba pás, ba Ukraina,” Don Virgílio do Carmo da Silva hateten ba jornalista sira, hafoin ordenasaun saserdotál ba diákonu na’in-rua no ordenasaun diakonál ba frater na’in-ida, iha Igreja Katedrál Dili.
Arsebispu ne’e hateten, hanesan mundu hatene katak iha momentu ne’e rai ida-ne’ebé funu no povu rua ne’e terus no susar tanba ida-idak iha nia interese, tanba ne’e Amo Papa Francisco konvida sarani Timor-Leste atu keta haluha husu ba Maromak liuhosi intersesaun Nai Feto nian hodi konsagra rai rua ne’e ba Na’in feto, nune’e pás bele to’o ba rai rua ne’e no povru rai rua ne’e nia terus mós bele menus.
Serimónia hasa’e orasaun pás nian ba Ukraina no Rusia ne’e, iha ámbitu ordenasaun saserdotál ba diákonu na’in-rua sai Na’ululik no ordenasaun diakonál frater na’in-ida, ne’ebé partisipa hosi Arsebispu Arkidioseze Metropolitana Dili, Don Virgílio do Carmo da Silva, SDB, reprezentante Santa Sé Don Marco Sprizzi, padre sira, diákonu, madre no sarani sira hotu.
Jornalista : Nelia Fernandes
Editór : Cancio Ximenes

