DILI, 30 marsu 2022 (TATOLI)— Adjuntu Sekretáriu Jerál Federasaun Futeból Timor-Leste (FFTL), Frederico Martins, informa hahú prepara orsamentu $50.000 hodi finansia selesaun nasionál U-23 ba partisipa jogu SEA Games ne’ebé realiza iha fulan-maiu, iha nasaun Vietname.
FFTL prepara orsamentu rasik hodi finansia ekipa Timor-Leste tanba haree ba kondisaun orsamentu hosi Sekretáriu Estadu Juventude no Desportu (SEJD) ba Komite Olímpiku Nasionál Timor-Leste (CONTL,sigla Portugés) no Konfederasaun Desportiva Timor-Leste (CDTL-sigla Portugés) ladun sufisiente.
“Tuir konkordansia FFTL hamutuk ho SEJD, CDTL no CONTL atu lori jogadór ba partisipa SEA Games tinan ida ne’e, FFTL mak sei toma konta, nune’e ita prepara hela orsamentu $50.000. Maibé sei halo lai konfirmasaun kona-ba billete aviaun nian ne’ebé montante ne’e hanesan estimasaun de’it,” SekJer Frederico hateten ba Agência TATOLI, kuarta ne’e.
Nia dehan, montante orsamentu $50.000 ne’ebé FFTL prevee ne’e sei provizóriu de’it tanba posibilidade bele aumenta bainhira konfirma ho billete aviaun nian atu arranka ba halo treinamentu (training Camp) ne’ebé sei hala’o entre nasaun rua hanesan jogadór Japaun no Koreia Súl.
Iha sorin seluk, Sekretáriu Jerál CONTL, Laurentino Guterres, sente orgullu ho desizaun FFTL nian ne’ebé sei finansia rasik jogadór sira partisipa jogu iha SEA Games no sei la utuliza orsamentu Governu nian.
“Ita orgullu ba FFTL tanba sira sei kobre rasik sira nia kustu bainhira sai hosi Timor-Leste hodi ba halo treinamentu iha nasaun liur, hafoin mak sai fali ba Vietname ne’e kustu sira selu rasik,” Laurentino kongratula.
Nia dehan, meiu ne’ebé FFTL halo di’ak tebes atu fó biban ba modalidade individuál sira atu hetan espasu hodi partisipa mós iha eventu mundiál ne’e.
Totál jogadór selesaun nasionál U-23 ne’ebé FFTL prepara atu ba partisipa iha SEA Games hamutuk na’in 20-resin.
Notísia relevante: FFTL hahú kontaktu nasaun rua sai fatin treinu ba selesaun nasionál U-23
Jornalista: Hortencio Sanchez
Editór : Florencio Miranda Ximenes
