iklan

DILI

MAE husu xefe suku labele utiliza fasilidade Estadu atende atividade partidaria

MAE husu xefe suku labele utiliza fasilidade Estadu atende atividade partidaria

Ministru Administrasaun Estatál, Miguel Pereira de Carvalho. Imajen TATOLI/Francisco Sony.

DILI, 30 marsu 2022 (TATOLI)—Ministru Administrasaun Estatál (MAE), Miguel Pereira de Carvalho, hateten MAE rejista Lideransa Komunitária ka xefe suku balun utiliza fasilidade Estadu nian hodi atende fali atividade partidaria nian.

“Ami rejista Líder Komunitária balun utiliza fasilidade Estadu hodi atende fali ba atividade partidária nian, ne’e labele. Ha’u husu para labele halo ida-ne’e,” Miguel hateten iha serimónia entrega ekipamentu eletróniku ba xefe suku, iha Autoridade Munisípiu Dili, kuarta ne’e.

Governante ne’e hateten, ekipamentu ka fasilidade ne’ebé disponibiliza ne’e ba halo atendimentu komun no hanesan autoridade lokál tenke tau-an hanesan líder ida hodi servi ba povu no nasaun ida-ne’e.

“Husu para Evita, nune’e públiku labele hatene ita-boot sira tama iha grupu ida-ne’e no ida-ne’ebá. Utiliza fasilidade Estadu nian hodi atende ba komunidade tanba agora dezastre naturál no problema sosiál oioin mak akontese,” nia sujere.

Nune’e, atu di’ak liu xefe suku ho Administradór Postu inklui ho Prezidente Autoridade Munisípiu sira tenke servisu hamutuk hodi servi no tau-matan ba povu nia preokupasaun sira.

“Tanba ohin loron ita iha dezastre naturál barak no ita iha problema sosiál oioin, nune’e papel xefe suku iha Dili importante tebes atu la’o entaun MAE ho esforsu hotu-hotu, nune’e fó atendementu ba suku hotu-hotu iha Dili hodi bele garante funsionamentu suku iha Dili tuir lei númeru 9/2016,” nia dehan.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!