ELEISAUN, POLÍTIKA

Komunidade husu Lú Olo pronunsia ba Governu dignifika veteranu ho pensaun vitalísia

Komunidade husu Lú Olo pronunsia ba Governu dignifika veteranu ho pensaun vitalísia

Kampaña ho tipu diálogu, Kandidatu Prezidente Repúblika períodu 2022-2027, Francisco Guterres Lú Olo, hala’o kampaña ho tipu diálogu iha salaun parokiál Same Vila, segunda (04/04) ne’e. Imajen Tatoli/Anito Santos.

MANUFAHI, 04 abríl 2022 (TATOLI)—Kandidatu Prezidente Repúblika periódu 2022-2027 ho númeru sorteiu rua (2), Francisco Guterres Lú Olo, hala’o atividade kampaña eleitorál ba loron datoluk ho tipu diálogu ba apoiante simpatizante no organizasaun forsa polítika no povu munisípiu Manufahi, segunda ne’e.

Notísia Relevante: Lú Olo sei propoin ba Governu dezenvolve setór agrikultura-peska iha Manufahi

Komunidade Manufahi, Francisco Amaral, husu ba Lú Olo bainhira reeleitu sai Xefe Estadu tenke servisu hamutuk ho ezekutivu tau atensaun ba kondisaun estrada no tenke dignifika veteranu ho pensaun vitalísia hanesan mós membru membru Parlamentu Nasionál no kargu titulár sira-ne’ebé simu pensaun vitalísia.

“Ami povu kontinua nafatin fó konfiansa ba ita-nia kandidatu Prezidente Repúblika 2022-2027 maibé hakarak ko’alia uitoan ba kestaun veteranu hanesan ita-boot sira iha Parlamentu Nasionál no membru Governu ne’ebé simu pensaun vitalísia, maibé família mate no ami ho grau 4a7 la hetan pensaun vitalísia ne’e hanesan ita ko’alia violasaun direitu umanu,” Francisco Amaral hateten iha ámbitu diálogu ho kandidatu PR, Francisco Guterres Lú Olo, iha salaun parokiál Same Vila.

Komunidade hosi postu administrativu Turiskai, Agostinho de Jesus, hato’o preokupasaun sosiál liu-liu ba estrada hosi Urahu ba Turiskai kondisaun ladi’ak, komunidade susar asesu bee-moos no komunidade iha suku Orana, Makere, Liurai no suku sira seluk seidauk asesu eletrisidade ba Lú Olo.

Nune’e mós, Salvador Tilman, hateten nia nafatin fó konfiansa ba kandidatu PR Lú Olo atu sai Xefe Estadu daruak maibé bainhira reeleitu, tenke koordena ho Governu tau atensaun ba problema ne’ebé povu hasoru.

“Iha postu administrative Alas tanbasá to’o agora estrada ho eletrisidade labele tama maibé ami rona eletrisidade iha fatin tolu ne’ebé tama ona iha planu nasionál, maibé to’o agora la hala’o,” nia dehan.

Notísia Relevante: 2022: Komisaun A sei fó prioridade ba alterasaun lei Pensaun Vitalísia

Nia husu, bainhira eleitu sai PR karik tenke fó atensaun mós ba manorin-na’in sira-ne’ebé servi povu nia oan sira maibé to’o agora seidauk asina kontratu maske sira dedika an hodi fó kontribuisaun hanorin labarik sira ho voluntáriu.

Aleinde ne’e, nia aprezenta mós kona-ba ponte tara ne’ebé konstrui iha suku Tutuluru iha tinan hirak liubá to’o agora seidauk iha reabilitasaun, ne’ebé ponte ne’e fasilita tebes komunidade hosi postu administrativu Turiskai, Alas, Fatuberliu ho Same.

“Triste tebes momentu udan to’o agora, ponte ne’e rede ai-kabelak sai kotu, rahun arbiru no ita-nia komunidade ultrapasa ne’e fó perigu ba sira-nia vida,” nia dehan.

Hatán ba ida-ne’e, Kandidatu Prezidente Repúblika, Francisco Guterres Lú Olo, hateten hanesan atuál Xefe Estadu antes ne’e halo vizita no halo diálogu hanesan ho komunidade Manufahi foti preokupasaun hirak ne’e hodi rejista no momentu akompaña direta hosi membru VIII Governu Konstitusionál hodi fó resposta ba responsavel kada área hanesan edukasaun, estrada, eletrisidade katak iha ona planu no programa atu halo.

“Tanba ne’e agora ba ha’u hanesan Prezidente Repúblika esplika katak Prezidente iha poder duni atu hato’o ba Governu saida mak povu ida-ne’e seidauk hetan hanesan fasilidade moris, tanba ne’e ba ezekutivu oinsá povu ida-ne’e hetan resposta ba sira-nia prokupasaun,” nia hateten.

Lú Olo konsidera, importante tebes presiza hadi’a estrada hodi bele fasilita estudante asesu ba eskola no kondisaun infraestrutura ida di’ak, maibé hanoin Governu iha planu no programa atu bele implementa.

“Ha’u hanesan Prezidente aprova tiha ona alterasaun lei jestaun orsamentu hodi define loloos orsamentu no programa ho rezultadu buat tolu ne’e, Governu kria hodi permite ba orsamentu atu bele hetan rezultadu iha tempu badak,” nia dehan.

Tanba ne’e, atu projeta ba oin mak nia hakarak kandidatu an dala ida tan no bainhira eleitu sai Xefe Estadu mak sei kontinua servisu hamutuk ho Governu atu responde povu nia preokupasaun no nesesidade.

Notísia Relevante: CNE deside kampaña ba segunda volta ramata iha 13 abríl

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!