Top

Kopa AFF Futsal, TL derrota kontra Austrália 4-7

Ekipa Selesaun Nasional Senior Futsal. imajen/espesial

DILI, 04 abríl 2022 (TATOLI)– Ekipa Timor-Leste ho naran istimadu Lafaek, segunda ne’e, derrota  kontra Austrália iha jogu dahuluk kopa Asian Football Federation (AFF) Futsal Championship 2022 ne’ebé hala’o iha Thailandia ho eskore 4-7.

Iha minutu primeiru hahú ekipa rua lansa kedan kontra no atake ba malu tuir tékniku no abilidade ekipa ida-idak nian hodi buka hatama golu, nune’e bele fó vitória ba ekipa ida-idak nian.

Notísia relevante: Aban, ekipa TL hahú kompete ho Austrália iha Copa AFF Futsal Championship

Jogu entre ekipa rua halo ho velosidade ne’ebé makas, Austrália jogu ho ofensivu ka jogu ho rítmu lais, enkuantu Timor – Leste mós joga ho velosidade, maibé akompaña mós ho defensiva atu antesipa sutu hosi Austrália nian.

Rezultadu jogu iha Kopa AFF entre Timor-Leste no Australia 4-7. Imajen/espesial

Maibé too jogu ramata sorte di’ak liu ba Austrália,  nune’e vitória monu ba sira nia liman. Golu ne’ebé ekipa Austrália, hetan prodús hosi jogadór Danel Fornito (5), Nicholar Rathjen (2), Jordan Gureiro (8) ho golu rua, Adeli (4) no Scott Rogan (7).

Enkuantu, Golu Timor-Leste nian hatama hosi jagadór Miguel (13), Shervin Keshavarz (10), Ramos (7), Nivaldo (2) no Andre Vong (12).

Sekretáriu Jerál Assosiasaun Futsal Timor- Leste (AFTL) hanesan mós ofisiál iha ekipa Timor-Leste, Fernando Baptista, hateten hateten, jogu Timor – Leste nia kapas tanba iha minutu primeira parte Timor mak lidera ho rezultadu 4-3.

“Jogu ohin ne’e kapas tanba iha minutu primeira parte nian ita mak lidera, ida ne’e ita iha mudansa uitoan, ho nune’e iha segunda parte ema aproveita ita nia fallansu mak hatama fali golu tolu iha ikus ne’e, nune’e eskore sa’e ba 4-7, ba oin fiar katak ita sei hadia fallansu sira ne’e,” dehan Fernando ba Agência TATOLI via rede sosiál.

Ho nune’e, nia dehan ho hakraik an lori ekipa hotu husu deskulpa ba povu Timor-Leste no hadomi na’in futeból sira tanba la konsege manán Austrália.

Iha jogu tuir mai, SekJer AFTL ne’e dehan, sei hasoru Vietnam no Myanmar sei bele halo mudansa atu bele hatudu rezultadu di’ak.

Tuir oráriu jogu dahuluk iha loron 04 abríl kontra Austrália, tuir mai iha loron 5 abríl kontra Vietname no no iha loron 6 abríl kontra Myanmar.

Rezultadu sorteiu divisaun grupu ba Copa AFF Futsál 2022, hanesan grupu A kompostu hosi nasaun Tailándia,Malazia, Indonézia, Kamboja no Brunei Darussalam.

Enkuantu grupu B, kompostu hosi nasaun Vietnam, Myanmar, Timor-Leste no Austrália.

Notísia relevante:AFTL hahú prepara-an kompete iha AFF Futsal Championship 2022

Jornalista: Hortencio Sanchez

Editór      : Florencio Miranda Ximenes

Publisidade

Leave a Reply

Latest Post

error: Content is protected !!