DILI, 04 abríl 2022 (TATOLI)—Diretór Nasionál Orsamentu Jestaun Finansa no Patrimoniál Ministériu Solidaridade Sosiál no Inkluzaun (MSSI), Jimmy Valente de Orlean dos Reis, informa iha trimestre dahuluk (janeiru-marsu) ne’e MSSI ezekuta ona OJE 2022 ne’ebé atinje ona 12,8%.
Notísia Relevante: OJE 2022: PN aprova millaun $22,7 ba MSSI
“Ministériu ida-ne’e nia ezekusaun Orsamentu Jerál Estadu ba periódu dahuluk nian atinje 12,8% ($18,618,326,09),” Jimmy Valente de Orlean dos Reis hateten ba Agência TATOLI, iha nia knar fatin Caicoli, Dili, segunda ne’e.
Hosi 12,8% ne’e fahe ba kategória ba saláriu no vensimentu 22,9% ho nia saldo $1,481,901,56, bens servisu 19,4% ho saldo $2,836,004,53, kapitál menor jero hela, kapitál dezenvolvimentu 82,5% no transferénsia públika 1,4% ho nia saldo $14.289.140.
“Kona-ba kapitál menor ne’e sei jero hela tanba sei halo prosesu aprovizionamentu, nune’e seidauk iha ezekusaun no kapitál dezenvolvimentu ami konsege obriga kompaña sira no komesa la’o ona, no kategória seluk sei halo iha segundu trimestre mai,” nia dehan.
Aleinde ne’e, kona-ba programa MSSI, diretór ne’e seidauk bele fó sai tanba sei iha prosesu rekolla iha departamentu nian ne’ebé iha loron 15 abríl mak bele konklui no sei públika sai.
Kona-ba dezafiu ezekusaun osan ba programa, nia hatán, dezafiu ba sira mak transporte limitadu no seluk mak rekursu umanu, entaun bele sai impaktu ba sira-nia ezekusaun ne’e.
Notísia Relevante: Infografia: Governu estabelese regra ezekusaun OJE 2022
Jornalista : Osória Marques
Editór : Cancio Ximenes
