DILI, 05 abríl 2022 (TATOLI)—Diretór Departamentu Prensaun no Sobrevivente, Manuel dos Santos, hateten Governu liuhosi Ministériu Asuntu Kombatente Libertasaun Nasionál (MAKLN) verifika ona dadus veteranu rejistadu 2009 atinje ona 48,3%.
Notísia Relevante: Ekipa nasionál verifikasaun dadus veteranu rejistadu 2009 foin verifika 120.000-resin
“Verifikasaun ne’e ami hahú kedas iha 2019 to’o ohin loron no ami valida ona 48,3% hosi veteranu rejistadu 124,690 iha tinan 2009 nian. Signifika kombatente hamutuk 60,247 mak ami verifika ona,” Manuel dos Santos relata ba Agência TATOLI, iha nia knaar fatin Caicoli, Dili, tersa ne’e.
Hosi verifikasaun validasaun ema 60,247 ne’e, nia dehan, Munisípiu Aileu hamutuk 3,567 (40.2%), Ainaro 3,657 (36%), Baucau 5,755 (37.6%), Bobonaro 5,439 (42%), Covalima 5,157 (51,8%), Dili 3,658 (49%), Ermera 4,697 (37,3%), Laútem 5,907 (61,3%), Liquiça 5,882 (53,4%), Manatuto 4,468 (55,8%), Manufahi 4,821 (70,5%), Oé-Cusse 3,441 (86,9%), Viqueque 3,766 (48,4%), sem munisípiu 1 (1,4%) no fora de Timor 31 (31%).
Nia dehan, iha fulan-maiu tinan 2022 ne’e MAKLN kontinua fali verifika veteranu rejistadu 64,443 iha territóriu nasionál, nune’e iha tinan ne’e bele finaliza ona verfikasaun ba veteran rejistadu 2009 ne’e.
Bainhira tama ba fulan-maiu nia-laran, parese Dili mós bele finaliza ona tanba hela de’it mak Ataúro mezmu agora Ataúro munisípiu ona maibé tuir jeografika rezisténsia nian Ataúro hanesan zona de’it, depois Manufahi hela suku ida parese maiu 2022 bele konklui ona.
“Munisípiu Baucau mak sei finaliza iha fulan-novembru tinan ne’e, tanba barak mak ita seidauk verifika. Tanba ne’e, ami esforsu nune’e iha tinan ne’e tenke konklui hotu ona nomós ami simu orientasaun hosi MAKLN no Sekretáriu Estadu Libertasaun Nasionál (SEKLN) katak tenke finaliza iha tinan ne’e,” nia dehan.
Notísia Relevante: Troka Oan Soru: verifikasaun dadus veteranu rejistadu 2009 seidauk bele kontinua
Jornalista : Osória Marques
Editór : Cancio Ximenes
