DILI, ELEISAUN, MUNISÍPIU, NASIONÁL

Governu prepara kamioneta 100 transporta eleitór sira vota iha munisípiu

Governu prepara kamioneta 100 transporta eleitór sira vota iha munisípiu

Eleitór sira forma hela atu vota. Imajen Tatoli/ António Dasiparu.

DILI, 07 abríl 2022 (TATOLI)—Vise Ministru Administrasaun Estatál (MAE), Lino de Jesus Torrezão, informa iha reuniaun Konsellu Ministru kuarta (06/04) ne’e aprova sei prepara kamioneta 100 hodi transporta eleitór sira hosi Dili ba sira ida-idak ninia munisípiu, hodi bele partisipa iha eleisaun segunda volta ne’ebé sei realiza iha 19 abríl 2022.

Notísia Relevante: Folin mina sa’e, STAE-CNE buka solusaun eleitór dezloka-vota iha munisípiu

“Horisehik Konsellu Ministru aprova ona katak iha 18 abríl 2022 ne’e feriadu, nune’e ita bele fasilita transporta hela ita-nia eleitór ba sira-nia moris fatin. Kona-ba transporte ka kamioneta ne’e loos hotu ona no hein loron 18 abríl atu tula de’it eleitór ba sira-nia munisípiu,” Governante ne’e hateten ba Agência TATOLI, iha nia knar fatin Colmera, Dili, kinta ne’e.

Prosesu atu transporta eleitór sira-ne’e, nia dehan, eleitór sira hosi parte leste ba konsentra iha terminál Becora, parte oeste konsentra iha Tasi-Tolu no parte rai-klaran nian konsentra iha merkadu Taibesi.

Kona-ba atu tula fila-fali eleitór sira iha ida-idak ninia munisípiu mai hikas Dili, nia dehan, normalmente Governu fasilita tula tiha bá maibé atu mai fali ne’e ema ida-idak mak aranja rasik transporte.

Tuir nia, kamioneta 100 ne’ebé Governu fasilita ne’e maihosi Patrimóniu Estadu no mós balun hetan apoiu hosi kampañia balun.

Governu prepara kamioneta 100 ne’e hodi transporta eleitór ba ida-idak nia munisípiu, nune’e sira bele ezerse sira-nia direitu votu iha eleisaun prezidensiál 2022 ba segunda volta.

“Planu, ohin, ami-na’in rua Ministru Administrasaun Estatál, Migule Pereira de Carvalho, katak prepara hela kamioneta 100 hanesan ne’e atu bele disponibiliza transporta eleitór ba jeográfika ema ida-idak ninia,” nia dehan.

Objetivu disponibiliza transporte, nia dehan, atu aumenta taxa partisipasaun iha eleisaun presidensiál 2022 iha segunda volta nian, tanba ne’e Governu esforsu kria kondisaun hodi aranja kamioneta hodi transporta eleitór ne’ebé mak la vota iha sentru votasaun paralelu ne’ebé Governu estabelese iha Dili.

Jornalista : Osória Marques

Editór       : Cancio Ximenes

iklan
iklan

One Comment

  1. Sujere deit
    Diak liu estudante sira tuir vota iha Suco ka aldeia neebe estudante sira hela ba iha Dili…tmba dalan ba area rural balu gora hetan estragus husi udan…

    Obrigda

Leave a Reply

iklan
error: Content is protected !!