LIQUIÇÁ, NASIONÁL, POLÍTIKA

Reeleitu ba PR, Lú Olo koopera ho Governu promove talentu juventude

Reeleitu ba PR, Lú Olo koopera ho Governu promove talentu juventude

Kandidatu Prezidente Repúblika períodu 2022 too 2027, ho númeru sorteiu 2, Francisco Guterres Lú Olo.imajen/Argentina Cardoso

LIQUIÇA, 12 abríl 2022 (TATOLI)- Kandidatu Prezidente Repúblika períodu 2022 too 2027, ho númeru sorteiu 2, Francisco Guterres Lú Olo, tersa ne’e hala’o kampaña ho tipu komísiu iha munisípiu Liquica.

Iha ámbitu kampaña, Kandidatu PR hosi Partidu FRETILIN ne’e, komprometidu bainhira povu fó fiar hodi reeleitu ba Prezidente Repúblika iha segunda volta mak serbisu hamutuk ho Governu atu promove talentu juventude sira nia iha área oioin.

“Bainhira ha’u eleitu nu’udar Prezidente Repúblika hakarak promove joven sira nia talentu iha área hotu,” dehan Lú Olo iha nia kampaña ne’ebé hala’o iha kampu futeból Liquiça.

Xefe Estadu hakarak servisu hamutuk ho Governu ne’ebé tutela ba asuntu juventude nian hodi promove talentu ne’ebé joven sira iha hanesan, desportu, Arte Marsiál, kultural no seluk tan atu iha oportunidade bele ba kompete iha nivél rejionál no internasionál.

“Promove joven sira nia talentu la’os ha’u mesak de’it mak halo,  maibé hamutuk ho Governu hodi haree ba asuntu sira ne’e, promove sira nia talentu no hametin sira nia organizasaun oioin ne’ebé eziste ona,” Lú Olo kompromete.

Nune’e, Kandidatu Lú-Olo husu ba Liquiça oan atu fó votu konfiasan iha eleisaun presidensiál segunda volta  ne’ebé sei hala’o iha loron 19 abríl ne’e hodi kontinua halo promulgasaun ba OJE  ne’ebé priotiza saúde, edukasaun liuliu hadia eskola sira ne’ebé aat ona no sesta bazika ba komunidade hotu no seluk tan.

Kandidatu ne’e mós agradese ba povu Liquiça ho votu hotu iha eleisaun primeira volta ne’ebé tau hamutuk ho munisipiu seluk sira mak ohin loron nia avansa ba segunda volta.

“Agradese ba Liquiça oan hotu, imi nia votu iha eleisaun primeira volta mak tau hamutuk ho votu hosi munisipiu seluk mak ohin loron, ha’u bele avansa ho José Ramos Horta iha segunda volta ne’e,” Lú Olo agradese.

Notísia relevante:Taur-Naimori husu povu vota Lú Olo hodi garante pás no estabilidade

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!