RAEOA-Votu Lú Olo menus kompara Horta
OÉ-CUSSE, 20 abríl 2022 (TATOLI) – Kandidatu prezidensial, Francisco Guterres Lú Olo, iha Rejiaun Administrativa Espesiál Oé-Cusse Ambeno (RAEOA) ho votu hamutuk 14.465 ho pursentu 37,77, enkuantu kandidatu José Ramos Horta ho totál votu 23.832, representa pursentu 62,23.
Tatoli observa katak ekipa apuramentu dirije hosi ofisiál Sekretáriadu Tékniku Administrasaun Eleitorál (STAE) rejionál, apuramentu hahú iha tersa 19 abríl, iha tuku 19:00 kalan no konklui iha 12:45.
Rekorda katak STAE rejionál rejista eleitór sira atu partisipa iha eleisaun prezidensial ba volta daruak 19 abríl ne’e hamutuk 50.673, maibé votante ne’ebé konsege ezerse direitu votu iha loron eleisaun hamutuk 38.563 ho taxa partisipasaun 76,10%, no mós rejista votu nulu hamutuk 198 (0,51%), votu branku 54 (0,14%) no votu reklamadu 14 (0,04%).
“Apuramentu iha RAEOA hosi sentru votasaun 60 no estasaun votu 88, hosi kandidatu na’in-rua, sira-nia rezultadu finál kandidatu númeru sorteiu 1, José Ramos Horta, mak manán ho votu 23.832 (62,23%) no kandidatu númeru sorteiu 2, Fransisco Guteres ‘Lú Olo hetan votu 14.465 (37,77%)”, Prezidente apuramentu munisípál, Tomas Oqui Meta, liuhosi anúnsiu rezultadu iha salaun Alfandega Palaban Oé-Cusse, tersa ne’e.
Iha prosesu eleisaun to´o apuramentu hetan seguransa másimu hosi Polísia Nasionál Timor-Leste (PNTL) no mós hetan supervizaun hosi Comisaun Nasionál Eleisaun (CNE, sigla portugés) no observadór internasionál hosi Uniaun Europeia (UE), Provedoria Direitu Humanu no Justisa (PDHJ) no hetan akompaña direita hosi fiskál kandidatura na’in-rua nian, no durante prosesu eleisaun ne’e realiza, parte CNE koloka ofisiál monitorizasaun hamutuk na’in-88, hamutuk ho brigadista na’in-60 no poling staf na’in-880.
Jornalista: Abílio Elo Nini
Editór: Zezito Silva
