iklan

EDUKASAUN, BOBONARO, HEADLINE, IMAJEN, MUNISÍPIU

MEJD lansa regra matríkula pre-eskolár iha Raifun

MEJD lansa regra matríkula pre-eskolár iha Raifun

Estudante Edukasaun Pre-Eskolár Raifun, postu administrativu Maliana, munisípiu Bobonaro, halo animasaun dansa hodi demostra kreatividade ba Ministru Edukasaun, Juventude no Desportu, Armindo Maia no komitiva. Imajen Tatoli/Sergio da Cruz

BOBONARO, 25 abríl 2022 (TATOLI) – Ministériu Edukasaun, Juventude no Desportu (MEJD), segunda lansa regra matríkula pre-eskolár iha Edukasaun Pre-Eskolár Raifun, postu administrativu Maliana, munisípiu Bobonaro, atu konsiensializa inan-aman sira atu kumpre prosedimentu sira iha tinan letivu sira tuir mai.

Ministru Edukasaun Juventude no Desportu, Armindo Maia, hateten pre-eskolár nu’udar aliserse ba edukasaun tanba ne’e governu kria polítika pre-eskolár atu prepara labarik sira-nia koñesimentu no abilidade.

Tanba haree katak durante ne’e labarik sira-ne’ebé hahú eskola kedas iha ensinu báziku ninia koñesimentu mínimu kompara ho labarik sira-ne’ebé asesu eskola liuhosi prosesu aprendizajen iha edukasaun pre-eskolár.

“Ho ida-ne’e mak governu halo ona mudansa paradigma katak edukasaun ne’e tenke responsabiliza hosi ema hotu, maibé importante oinsá mak apoiu inan-aman sira atu partisipa iha prosesu edukasaun ba ita-nia oan no bei-oan sira,” nia apela.

Tuir dadus hosi Ministériu Edukasaun, Juventude no Desportu katak, daudaun ne’e labarik iha Timor-Leste 30% mak foin asesu edukasaun pre-eskolár iha eskola públiku ne’ebé governu estabelese inklui eskola privada no katólika sira iha munisípiu 12 no RAEOA.

Tanba problema boot ne’ebé hasoru mak komunidade sira barak mak hela dook malu la konsentra iha fatin ida de’it, entaun bainhira atu ba eskola labarik kiik sira tenke la’o ho distánsia dook, hakur mota no sa’e foho-lolon.

Ho nune’e VIII Governu Konstituisionál nia kompromisu ne’ebé difine ona iha meta Objetivu Dezenvolvimentu Sustentávél (ODS) 2011-2030 katak 50% labarik iha territóriu nasionál tenke asesu hotu edukasaun pre-eskolár.

“Hau dezeja katak liuhosi programa ne’e atu oinsá mak inan-aman no autoridade sira hotu nafatin fó akompañamentu ba oan no bei-oan sira atu partisipa iha edukasaun pre-eskolár hodi atinje objetivu ne’ebé ita hakarak atu ajuda labarik sira asesu edukasaun ne’ebé di’ak no kualidade,” nia katak.

Prezidente Autoridade Munisípiu Bobonaro, Ernesto de Oliveira Barreto, enkoraja inan-aman sira atu kumpre prosedimentu sira-ne’e nune’e labarik sira bele asesu edukasaun ho loloos.

“Ha’u atu dehan de’it pre-eskolár la’ós loke de’it iha fatin hotu, maibé ba de’it fatin sira-ne’ebé mak permite no hakonu kritéria mak foin bele loke, entaun ita tenke kumpre nafatin atu ita-nia oan sira-nia futuru bele sai di’ak,” nia hateten.

Diretór Edukasaun Munisípiu Bobonaro, Crispim Moniz, agradese ba governu tanba esforsu ona atu labarik sira asesu hotu edukasaun hahú kedas iha pre-eskolár.

“Atividade ne’e importante tebes atu bele konsiensializa inan-aman sira hodi bele hatene kona-bá prosedimentu no lala’ok matríkula asesu ba eskola nian,” nia akresenta.

Tuir dadus hosi Servisu Edukasaun Munisípiu Bobonaro totál Esinu Pre-Eskolár ne’ebé estabelese iha munisípiu Bobonaro hamutuk 55 kompostu hosi eskola públiku 41 no privada no Katólika hamutuk 14, profesór na’in-125 kompostu hosi permanente 21 kontratadu 60 no restante voluntáriu.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!