DILI, 25 abril 2022 (TATOLI)-–Primeiru-Ministru (PM), Taur Matan Ruak, akompaña ho Ministru Obra Públika (MOP), Abel Pires no Vise-Ministru Obra Públika, Nicolau Lino Freitas Belo, iha sábadu kalan halo observasaun direta ba reabilitasaun estrada parte Terminál Tasi-tolu to’o mai Raikotu, ho distánsia kuaze metru 680, reabilita hosi empreza nasionál Jonize.
“Rehabilitasaun ne’e nu’udar parte ida ba seremónia pose ba Prezidente Repúblika foun no komemorasaun tinan 20 Restaurasaun Indepedénsia Repúblika Demokrátika Timor-Leste (RDTL) ne’ebé sei realiza iha Tasi-tolu, ne’ebé sei marka prezensa mós hosi alta dignitáriu sira hosi país amigu,” refere nota ne’ebé Agência TATOLI asesu segunda ne’e.
Notísia relevante: Semana ne’e, kompañia Jonize sei halo reabilitasaun estrada Tasi-tolu
Iha obervasaun ne’e, Xefe Governu ko’alia direta ho dirijente empreza atu halo serbisu extra liután, nune’e bele halo kaber lalais molok to’o loron seremónia.
Iha biban hanesan, Diretur empreza Jonize, Jin Filipe, garante ba Xefe Governu katak molok tama loron 19 maiu, empreza sei halo kaber hodi fui alktaraun, nune’e iha loron 19 maiu kalan bele fasilita ona movimentasaun bainaka sira ba fatin seremónia iha Tasi-tolu.
Xefe Governu husu atu fó seguransa másimu ba traballadór sira durante serbisu no husu atu kontrola mós movimentu rodoviáriu no ema fa’an sasán sira besik fatin reabilitasaun atu labele interompe empreza nia serbisu.
Durante observasaun, PM nota katak movimentu transporte no vendedór sira interompe serbisu konstrusaun, nune’e Xefe Governu hafoin fila hosi Ermera tun direta hodi observa no orienta parte seguransa atu haree asuntu refere atu ekipa iha terrenu bele serbisu livremente no bele termina tuir akordu ne’ebé asina ona.
Estrada ligasaun Tibar-Rotunda Prezidente Nicolau Lobato ne’e tama iha pakote ida liuhosi Fundu empréstimu Banku Dezenvolvimentu Aziátiku (ADB, sigla inglés), maibé ikus mai reabilitasaun ne’e to’o de’it iha Terminál Tasi-Tolu nian, no hosi Terminál mai to’o iha Rotunda Prezidente Nicolau Lobato.
Aleinde ne’e, ekipa hasoru difikuldade halo libertasaun terrenu tanba ne’e demora no foin iha tinan ne’e mak Governu konsege rezolve hodi indemniza ona okupante sira besik estrada ninin no tuir planu kontinuasaun obra ne’e sei halo iha tinan ida-ne’e hafoin Governu preinxe rekizitu balun tan hosi ADB.
Durante observa, marka prezensa mós hosi Vise-Ministru Interior, Segundu Komadante Jerál Polísia Nasionál Timor-Leste (PNTL), Komandante Tránzitu Nasionál no Komandante munisípiu Dili.
Jornalista : Antónia Gusmão
Editora : Julia Chatarina
