DILI, 26 abríl 2022 (TATOLO)–Pontu Vogál UN Women, Hélio Miguel, hateten iha futuru presiza alastra formasaun literasia no dijitalizaun ba munisípiu seluk hodi bele kombate fake news iha mídia sosiál (facebook).
Nia hatutan, liuhosi formasaun literasia no dijitalisaun ne’e hodi bele halo mudansa ba joven sira liu-liu feto sira uza liafuan ódiu malu liuhosi mídia sosiál.
“Ita uza Plataforma ida-ne’e atu sai hanesan mensajen ida ba musdansa hodi atinje no haree ba koezaun sosiál ne’ebé sai problema makaas iha globál no iha Timor-Leste mós,” Miguel hateten ba jornalista sira, hafoin distribui sertifikadu ba partisipante sira, iha Maubara Room Timor Plaza, tersa ne’e.
Nia agradese ba joven sira tanba sira iha inisiativa hodi lidera ona joven 100-resin no nia hakarak ba futuru ne’e bele kobre tan munisípiu sira seluk, ho esperansa no objetivu atu luta no kombate liafuan odiu sira-ne’ebé iha mídia sosiál.
Programa ne’e realiza iha munisípiu haat hanesan Dili, Ermera, Liquiça no Manatuto no etapa dahuluk hahú ona iha tinan 2020 durante fulan haat.
Iha 2021 to’o abríl 2022, formasaun fulan neen ho fundu ne’ebé DIVAT apoiu hamutuk $96,000 ba etapa rua ne’e nian.
Formasaun literasia no dijitalizaun ba joven sira-ne’e durante loron sanulu (10) nia-laran no ohin simu sertifikadu ona.
Partisipante Joanita Pinto hateten, futuru presiza kontinua fó formasaun ba atividade ida-ne’e tanba iha era dijitalizasaun ne’e presiza ema hotu hasa’e koñesimentu ba programa refere.
“Atividade ida-ne’e atu hasa’e nafatin sosiedade nia koñesimentu ba uzu teknolojia nian,” nia dehan.
Prezidente Konsellu Imprensa, Virgílho Guterres, hateten formasaun ne’e importante ba joven sira liu-liu iha kontestu luta ba feto nia direitu tanba joven feto barak liu sai alvu ka vítima ba diskriminasaun no asediu iha komunikasaun nian.
CI konsidera no presiza duni hodi kontinua fó formasaun ba joven feto sira no hein katak sei alastra mós iha munisípiu sira hotu, se iha Dili entaun presiza akumula hotu ema joven feto sira hodi bele partisipa iha programa refere.
“Esforsu CI nian ba literasia no dijitál ne’e mak CI identifika no tenke partisipa mak CI luta kontra desinformasun no luta kontra fake news. Ida-ne’e ita define tiha ona nia servisu maibé importante mak oinsá atu kria no estabelese rede parseiru no durante ne’e parseiru ne’ebé mak importante mak Programa Nasaun Unida ba Dezenvolvimentu (UNDP-sigla inglés) no UNESCO inklui jornalista sira mós oinsá sai fasilitadór ba formasaun literasia dijitál ne’e,” nia dehan.
Jornalista : Osória Marques
Editór : Cancio Ximenes
