iklan

EKONOMIA, HEADLINE

Governu aprova dekretu-lei regula kompeténsia autoriza realizasaun despeza

Governu aprova dekretu-lei regula kompeténsia autoriza realizasaun despeza

Primeiru Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (27/04). Imajen Tatoli/Francisco Sony

DILI, 27 abril 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova Projetu Dekretu-Lei ida no Projetu Dekretu Governu rua, iha ámbitu Lei Enkuadramentu ba Orsamentu Jerál Estadu no ba Jestaun Finanseira Públika, ne’ebé aprezenta hosi Ministru Finansa, Rui Augusto Gomes.

“Diploma sira ne’ebé hetan aprovasaun ho objetivu regula kompeténsia atu autoriza realizasaun despeza hosi servisu no entidade setór públiku administrativu nian,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Ho diploma ida-ne’e, bainhira iha despeza ho valór millaun $10 ba leten, maka KM iha kompeténsia ]fó autorizasaun ba realizasaun despeza no bainhira despeza sira hanesan ka menus hosi millaun $10, órgaun diresaun servisu no entidade setór públiku administrativu ho autonomia finanseira alargada mak iha kompeténsia atu fó autorizasaun ba realizasaun despeza.

Notísia relevante: Lei Enkuadramentu Orsamentál nu’udar pasu dahuluk reforma jestaun públika

Enkuantu, órgaun sira hanesan Prezidénsia Repúblika, Parlamentu Nasionál no munisípiu nian iha kompeténsia atu autoriza realizasaun despeza ne’ebé la haree ba ninia valór.

Iha Rejiaun Administrativa Espesiál Oe-cusse Ambeno (RAEOA) nian, ninia órgaun deliberativu rasik mak iha kompeténsia atu fó autorizasaun ba despeza ho valór millaun $10 ba leten.

“Projetu Dekretu Governu prosede halo regulamentasaun ba estrutura klasifikadór orsamentál sira, espesifikasaun reseita no despeza Orsamentu Jerál Estadu sei halo liuhosi utilizasaun ba klasifikadór orsamentál sira, ne’ebé sai nu’udár estrutura klasifikasaun orgánika, ekonómika no funsionál,” Portavós Governu tenik.

Estrutura liuhosi programa Orsamentu Jerál Estadu maka agrupamentu despeza sira hosi objetivu, atubele prodús rezultadu sira.

Programa orsamentál sira sei organiza liuhosi nível tolu hanesan programa, sub-programa no atividade, nune’e nível programa aprezenta objetivu jerál ho objetivu atu hetan rezultadu sira, nível sub-programa aprezenta objetivu espesífiku ho objetivu atu hetan rezultadu sira no nível atividade aprezenta asaun lubun ida ne’ebé kontribui atu prodús rezultadu sira.

“Kódigu ba programa orsamentál sira kompostu hosi algarizmu alfanumériku hitu, ne’ebé tolu dahuluk korresponde ba nível programa, algarizmu rua tuir-mai korresponde ba nível sub-programa no algarizmu rua ikus korresponde ba nível atividade nian,” governante ne’e dehan.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!