DILI, 27 abril 2022 (TATOLI)—Governu liuhosi reuniaun Konsellu Ministru (KM), kuarta ne’e, aprova Projetu Rezolusaun Governu, ba nomeasaun João Amaral, nu’udár Prezidente Konsellu Fiskál Bee Timor-Leste, Empreza Públika (BTL, E.P) no Regina de Jesus no Acácio Pinto, nu’udár vogál Konsellu Fiskál.
“Konsellu Fiskál nu’udár órgaun fiskalizasaun BTL, E.P ne’ebé estabelese atu garante komprimentu hosi norma legál, norma estatutária no norma regulamentár sira ne’ebé aplikável ba empreza no fiskaliza ninia jestaun finanseira no patrimoniál,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezektivu, iha Palásiu Governu.
Notísia relevante: Governu nomea Carlos Peloi sai Prezidente Konsellu Administrasaun BTL,E.P
Tuir estatutu empreza públika, nomeasaun ne’e propoin hosi membru Governu ne’ebé responsável ba setór bee no saneamentu hanesan Ministru Obra Públika, Abel Pires da Silva no Ministru Finansa, Rui Augusto Gomes.
Antes ne’e, Governu hola inisistiva transforma Diresaun Jerál Água no Saneamentu (DGAS, sigla portugés) ba Empreza Públika (BTL,E.P) ho hanoin ida atu hasa’e prestasaun servisu no atendimentu ba konsumidór bee-moos iha Timor-Leste.
Aleinde ne’e, estabelese mós identidade Reguladór Água no Saneamentu no dekretu-lei estabelese kritériu ba kontrolu kualidade bee hodi bele uza ba konsumu umanu.
Nune’e, BTL, E.P hahú servisu desde janeiru 2022, hanesan instituisaun ne’ebé iha ona autónomu administrativa, finanséiru no judisiáriu atu halo melloramentu ba sistema bee-moos.
Jornalista : Antónia Gusmão
Editora : Julia Chatarina
